गैँडाकोट । नवलपुरमा पनि कृषि गणना सम्वन्धी जिल्ला स्तरीय सचेतना गोष्ठी आज सम्पन्न भएको छ । जिल्ला समन्वय समिति नवलपुरको सभाहलमा सम्पन्न कार्यक्रममा जिल्ला कृषि गणना अधिकृत रेणु कुमारी घिमिरेले सातौँ राष्ट्रिय कृषि गणनाको समग्र जानकारी र संकलन गरिने तथ्याङ्कबारे बताउनुभएको थियो । हरेक १० /१० वर्षमा आउने यस गणनामा यथार्थ तथ्याङ्क संकलनमा सवैले सहयोग गर्नुपर्ने बताउँदै जिल्लाबाट तयारी तीव्र बनाएको जानकारी दिनुभयो ।
नवलपुरको आठ वटा स्थानीय तहमा १५५ गणना क्षेत्र कायम भएको र १४ जना सुपरीवेक्षक ५५ जना गणक खटिने बताउनुभयो । कृषि गणनाको सार, कृषि योजनाको पूर्वाधार भन्ने मूल नारा सहित बैशाख ६ देखि जेठ १९ गते सम्म गणना गरिने घिमिरेको भनाई छ ।
जिल्ला कृषि गणना समन्वय समितिका अध्यक्ष प्रमुख जिल्ला अधिकारी सुमन घिमिरेको अध्यक्षतामा भएको कार्यक्रममा बोल्दै प्रमुख अतिथि जिल्ला समन्वय समितिका प्रमुख चेसराम आलेले जनस्तरमा कृषि गणनाको जानकारी पुर्याउन सुझाव दिनुभयो । जनगणनामा धेरै घर परिवार छुटेको भन्दै कृषि गणनामा त्यो कमी कमजोरी दोहोरिन नहुने बताउनुभयो ।
मन्त्रालयमा बसेर बनाएका योजनाले फिल्डको वास्तविकता नआउने हुँदा अहिले संकलित तथ्याङ्क यथार्थ र तथ्य सहित ल्याउन आग्रह गर्नुभयो । जनप्रतिनिधिको तर्फबाट गर्नुपर्ने सवै सहयोग गर्न तयार रहेको भन्दै आलेले गणना हुने १५५ वटै क्षेत्रमा कृषकले थाहा पाउने गरी सूचना पुर्याउन सुझाव दिनुभयो । आलेले भन्नुभयो,“एकै चोटी झ्वास्स गएर प्रश्नहरु गर्दा कृषक आत्तिन सक्छन् । सही उत्तर नदिन सक्छन् । त्यसैले कस्ता प्रश्नहरु गरिन्छ त्यो बारे पर्याप्त छलफल र सूचना पुर्याउनुपर्छ ।”
वडास्तर सम्म निर्माण भएका समितिलाई सक्रिय बनाउँदै सातौँ कृषि गणना सफल पार्न शुभकामना दिनुभयो । साथै प्रभावकारी अनुगमन समिति पनि बनाउन सके विश्वसनीय तथ्याङ्क आउने दावी गर्नुभयो ।
