डोलराज रानाभाट । निर्वाचन आयोगले आगामी स्थानीय निर्वाचन २०७९ का लागि अन्तिम मतदाता संख्या र केन्द्र सार्वजनिक गरेको छ । आयोगले हिजो सो विवरण सार्वजनि गरेको हो।
जसअनुसार नवलपुर जिल्लामा २ लाख ५४ हजार ६१५ जना मतदाताले भोट हाल्न पाउने भएका छन् । जसमा १ लाख ३३ हजार ५७३ जना महिला र १ लाख २१ हजार ३८ जना पुरुष रहेका छन् । ४ जना अन्य लिङ्गीका मतदाता समेत नवलपुरमा रहेका छन् । आयोगले यस जिल्लामा ११३ वटा मतदान स्थल र २९९ वटा मतदान केन्द्र रहनेगरी टुंगो लगाएको छ ।
जिल्लाको कुल आठ स्थानीय तहमध्ये गैँडाकोट नगरपालिकामा ४७ हजार ७१५ मतदाता रहेको टुंगो लागेको छ । जहाँ २५ हजार ७९ महिला र २२ हजार ६३६ पुरुष मतदाता छन् । उनीहरुले नै २१ वटा मतदान स्थल र ५५ वटा मतदान केन्द्र तोकिएको, त्यहाँ भोट खसाल्नेछन् ।
निर्वाचन गराउन आयोगले सर्वोच्च अदालतका इजलास अधिकृत दिपशिखा मुनाकमीलाई निर्वाचन अधिकृत तोकिएको छ ।
जिल्लाका आठ स्थानीय तहमा धेरै मतदाता हुने पालिकामा गैँडाकोट दोस्रो हो । पहिलो कावासोती रहेको छ । जहाँ ५५ हजार ३३० जनामा २९ हजार ४३९ महिला र २५ हजार ८८९ पुरुष रहेका छन् । २ जना अन्य लिङ्गी समेत रहेको यहाँ २१ मतदानस्थल र ६४ वटा केन्द्र तोकिएको छ ।
सवैभन्दा थोरै मतदाता बौदीकाली गाउँपालिकामा कुल ११ हजार ४९७ जना रहेकोमा ५ हजार ७१४ जना महिला र ५ हजार ७८३ जना पुरुष रहेका छन् । यहाँ ६ वटा मतदानस्थल र १३ वटा मतदान केन्द्र कायम गरिएको छ ।
देशैभर एकसाथ हुने निर्वाचनमा कुल १ करोड ७७ लाख ३३ हजार ७ सय २३ मतदाता छन् ।
सम्बन्धीत अन्य समाचार
नवलपुरमा कति मतदाता ?
चितवनमा कति मतदाता ?
