चितवन । दसैँका लागि केही दिन बन्द भएको मनकामना केबुलकार आजदेखि नियमित संचालनमा आएको छ ।
देशकै प्रशिद्ध मन्दिर मनकामना पुग्न अत्यधिक प्रयोगमा आएको केबुलकार विजया दशमीको भोलिपल्ट अर्थात आज देखिनै संचालनमा आएको हो ।
नेपालीको महान् चाड बडादसैँको महानवमी र विजयादशमीका दिन सेवा बन्द गरिएको थियो ।
विगतका वर्षमा दसैँका तीन दिन बन्द गरिँदै आएकोमा यस वर्ष भने महानवमी र विजयदशमी दुई दिन मात्र बन्द गरिएको मनकामना दर्शन प्रालिका नायब महाप्रबन्धक उज्जवल शेरचनले बताउनुभयो ।
गोरखाको प्रसिद्ध धार्मिक स्थल मनकामना मन्दिर दर्शन गर्न जाने दर्शनार्थीको सहजताका लागि सञ्चालन गरिएको नेपालकै पहिलो केबुलकार मनकामना केबुलकार कोरोना भाइरस सङ्क्रमण जोखिमका कारण बन्द भएपछि २०७८ भदौ २३ गतेदेखि खुलेको हो ।
गत भदौ २३ देखि असोज २७ गतेसम्म ५५ हजार मानिसले केबुलकारबाट सेवा लिएको नायब महाप्रबन्धक शेरचनले बताउनुभयो ।
