चितवन । भरतपुरमा निर्माणाधीन गौतम बुद्ध अन्तर्राष्ट्रिय क्रिकेट रंगशालाको काम अगाडि बढाउन सम्झौता भएको छ । अलपत्र रंगशाला निर्माणका लागि भरतपुर महानगरपालिकाले ठेकेदार कम्पनीसँग सम्झौता गरेको हो । आइतबार महानगरपालिका र निर्माण कम्पनी हिमालयन कालिञ्चोक जेभीबीच सम्झौता पत्रमा हस्ताक्षर गरेका हुन् । १ अर्ब २० करोड रुपैयाँको ठेक्का आह्वान गरेकोमा १२ वटा कम्पनीले प्रस्ताव पेश गरेका थिए ।
तिमध्ये सबैभन्दा कम लागत ६८ करोड २ लाख ६४ हजार रुपैयाँमा ठेक्का प्रस्ताव दिने सो कम्पनीसँग सम्झौता गरिएको महानगरले जनाएको छ । कम्पनीले यो बजेटबाट रंगशालाको मैदानसहित ५ वटा पीच, १५ हजार जना बस्न मिल्ने प्याराफिट, ड्रेन, २ वटा ३र३ तल्लाको भिआईपी टावरलगायतका संरचनाहरू निर्माण सम्पन्न गर्नेछ । रंगशालामा ५ हजार जना दर्शक अट्ने प्याराफिट बनिसकेको छ । गत फागुन १७ गते महानगरले ३० दिनको म्याद राखेर रंगशाला निर्माणका लागि टेण्डर आह्वान गरेको थियो ।
तर एउटामात्रै कम्पनीले प्रस्ताव राखेपछि त्यो प्रक्रिया विवादित बन्यो । महानगरले उक्त प्रक्रियामा राखिएको रंगशाला निर्माण गरेको कम्पनीलाई मात्रै ठेक्का दिने भन्ने मापदण्ड हटाइ उक्त टेण्डर रद्ध गरेर जेठ ३ गते पुनः टेण्डर आह्वान गरेको थियो । दोस्रो पटक १ अर्ब १० करोड रूपैयाँको टेण्डर आह्वान गरिएको थियो । पछिल्लो टेण्डर प्रस्तावमा पहिलो पटक प्रस्ताव दिएको कम्पनीभन्दा १० लाख ७५ हजार कम प्रस्ताव पेश गरेको हिमालयन कालिञ्चोक जेभीसँग ठेक्का सम्झौता भएको महानगरले जनाएको छ ।
ठेक्का सम्झौता अनुसार ३० महिनाभित्र काम सम्पन्न गरिसक्नुपर्नेछ । हिमालयन कालिञ्चोक जेभी प्रवन्ध निर्देश्क विकास गौतमले १५ दिनपछि रंगशाला निर्माणको काम थाल्ने बताउनुभयो । काम ठप्प भएपछि भरतपुर महानगरपलिकाले स्वामित्व लिइ निर्माण प्रकृयाको बजेट सुनिश्चित गर्न पहल गरेको हो । रंगशाला निर्माण गर्न आगामी आर्थिक वर्षका लागि संघ र प्रदेश सरकारले ५० करोड रूपैयाँ विनियोजन गरेको महानगरपालिकाकी मेयर रेनु दाहालले जानकारी दिनुभयो । भरतपुर महानगरपालिकाले पनि रंगशालाको अधुरो काम पुरा गर्न भनेर आगामी वर्षका लागि ४ करोड ३० लाख रूपैयाँ बजेट नगरसभाबाट स्वीकृत गरेको छ ।
