चितवन । चितवनमा किसानहरुले सडकमा तरकारी फालेर विराेध गरेका छन् ।
भारतीय तरकारीका कारण आफूहरुले उत्पादन गरेका तरकारी बिक्नै छाडेको र बिक्रि भइ हाले पनि उचित मूल्य नपाएको भन्दै उनीहरुले सडकमा तरकारी फालेका हुन् ।

चितवनका विभिन्न स्थानका किसानहरु नारायणगढमा आएर पूर्वपश्चिम राजमार्गमा तरकारी फालेका हुन् ।

भारतबाट आयातित तरकारीले भरतपुरका मण्डीमा कब्जा जमाएको र चितवनमा उत्पादित तरकारीले मूल्य नपाएको उनीहरुको गुनासो छ । किसानहरुले संघर्ष समिति नै बनाएर बारीबाट गाडीमा तरकारी बोकेर आएका थिए ।

संघर्ष समितिका संयोजक लेखराम भुषालले भारतबाट भइरहेको तरकारीको आयतलाई रोक्नुपर्ने बताए । अहिले जिल्लालाई पुग्ने तरकारी आफूहरुले नै उत्पादन गरिहेको भन्दै उनले बाहिरबाट ल्याउन आवश्यक नरहेको बताए । उनले भारतबाट ल्याउनै परे कर लगाउने व्यवस्था गर्नुपर्ने माग राखे ।