चितवन । साङ्ग–बिराट्–श्रीगायत्रीकोटिहोम ज्ञानमहायज्ञको लागि नारायणी नदीकिनारमा हवन, मण्डप र पञ्च कुण्डको निर्माण तीव्र पारिएको छ । माघ १२ वसन्तपन्चमीदेखि फागुन १२ गतेसम्म नदीकिनारमा हुने ज्ञानमहायज्ञको तयारीका लागि हवन मण्डप र कुण्ड बनाउन लागिएको हो ।
निर्माणधीन कुण्डको (शुक्रबार) महायज्ञका संरक्षक महेश सन्यास आश्रमका पिठाधिस १००८ स्वामी रमाणानन्द गिरीजीमहाराज र गण्डकी–नारायणी महाआरती परिषद्कावरिष्ठ सल्लाहकार टंकनाथ पौडेललगायतले निरीक्षण गरेका छन् । महायज्ञको तयारी युद्धस्तरमा अगाडि बढाइएको छ ।
ब्राह्मणलाई खानपिन तथा आवास र यज्ञको लागि आवश्यक पर्ने हवनकर्ताको व्यवस्था गर्ने कार्य अन्तिम चरणमा पुगेको महायज्ञ संयोजक एवम् श्रीगण्डकी–नारायणी संरक्षण महाआरती परिषद्का अध्यक्ष प्रेमनिधि भारद्धाज कँडेलले जानकारी दिनुभयो । कोटिहोम ज्ञानमहायज्ञमा ब्राह्मणहरुले एक महिनामाएक करोड ४९ लाख ८५ हजार पटक गायत्रीमन्त्रजप गर्नुपर्छ । लाखौँ भक्तजन महायज्ञमा आउने विश्वास लिइएको छ ।
योगी नरहरीनाथले शरिर छाडेपछि पहिलो पटक ब्रह्मगायत्री मन्त्रद्धारा हवन हुन लागेको हो । नेपाल सन्त समाजका अध्यक्ष स्वामी ज्ञानानन्द सरस्वती महाराजको प्रमुख संरक्षकत्व तथा महामण्डलेश्वर आत्मानन्दगिरी, रमणानन्द गिरी, स्वामी जगन्नाथाचार्य, हरिशरण उपाध्याय, किशोरकुमार गौतम आदि नेपालका प्रमुख सन्तमहात्माहरूको संरक्षकत्वमा महायज्ञ हुने आयोजकले जनाएको छ ।