चितवन । चितवनमा रहेको बीपी क्यान्सर मेमोरियल अस्पतालमा जाँच गराएका ६ हजार ६३ जनामा क्यान्सर रोग देखिएको छ ।
यो एक आर्थिक वर्षको तथ्याङ्क हो । अस्पतालले आज पत्रकार सम्मेलन गरी दिएको जानकारी अनुसार २ हजार ७०२ जना पुरुष र ३ हजार ३६१ जना महिलामा यो रोग देखा परेको हो ।
क्यान्सर देखिने उमेर समूहमध्ये सवैभन्दा बढी ५५ देखि ५९ वर्षभित्रका मानिसहरु छन् । अस्पतालले दिएको तथ्याङ्क अनुसार ७१५ जनामा क्यान्सर देखिएको हो । त्यसपछि ६० देखि ६४ का ७०१, ५० देखि ५४ वर्षका ६७९ जनामा क्यान्सर रोग देखिएको हो ।
त्यस्तै ४ वर्षसम्मका ४२ जना, ९ वर्षसम्मका ७७ जना, १४ वर्षसम्मका ९२ जना, १९ वर्षसम्मका ९० जना, २४ वर्षसम्मका १४६ जना, २९ वर्षसम्मका २०० जनामा क्यान्सर देखिएको तथ्याङ्क छ । त्यस्तै ८० वर्षमाथिका १४९ जनामा क्यान्सर देखिएको हो ।
१ लाख ६४ हजार ५९५ जनाले ओपीडी सेवा लिएकाहरुमध्ये १ लाख ६२ हजार ६२२ जना नेपाली र १ हजार ९७३ जना विदेशीले यस अस्पतालमा चेकजाँच गराएका हुन् ।
नेपालका मध्ये चितवनका सवैभन्दा धेरै २३ हजार ४२४ जनाले अस्पतालबाट सेवा लिएका थिए । त्यसपछि रुपन्देही, नवलपुर,धनुषा,दाङ, बारा, तनहुँ, कैलाली, सिराहा र सर्लाहीबाट धेरै विरामी आउने गरेका हुन् ।