ओसाका,जापान । एनआरएनए जापान क्षेत्रीय समिति कान्साइले नेपालबाट जापान प्रवेश गर्नुभएका नयाँ विद्यार्थीहरुलाई स्वागत सहित यहाँ पालना गर्नुपर्ने नियम तथा आनिवानीवारे प्रशिक्षण दिएको छ ।
योदोगावा वार्ड निसीमाकाजीमा ४ चोमेमा एक कार्यक्रम गरी स्वागत गरिएको हो । संयोजक दीलीप शर्मा गैरेको अध्यक्षतामा भएको कार्यक्रममा बोल्दै प्रमुख अतिथि एनआरएनएका एशिया प्यासिफिकका संयोजक पारसमणी पोख्रेलले विद्यार्थी जीवनमा पैसा मात्रै ठूलो नरहेको भन्दै समाज र समूहमा जोडिन सुझाव दिनुभयो । त्यसरी जोडिन सके जतिसमस्या भएपनि हिम्मतका साथ जुध्न सकिने बताउँदै सर्कसको सिँह नभई जंगलको सिँह वन्न सुझाव दिनुभयो । विद्यार्थीले आफ्नो आत्मविश्वास उच्च बनाएर राम्रो गुण भएका व्यक्तिहरुसँग संगत गर्न आग्रह गर्नुभयो ।
विद्यार्थीका लागि जापान धेरै अवसरको देश भएकाले अहिले काममा भन्दा भाषामा जोड दिन सुझाव दिनुभयो । साथै यहाँको ऐन नियमलाई कडाइका साथ पालना गर्न आग्रह गर्दै अनुशासनलाइ कायम राख्न उहाँको सुझाव थियो । एनआरएनए संस्था राजनीतिक संस्था नभएको भन्दै विद्यार्थीको अभिभावक वन्ने बताउनुभयो । संस्थाले ठूलो संख्यामा विद्यार्थीहरुलाई स्वागत गरेको सायदै यो पहिलो कार्यक्रम भएको भन्दै यसरी अनुभव सुन्ने अवसर पाउनुपनि ठूलो अवसर भएको बताउनुभयो ।
कार्यक्रमका विशिष्ट अतिथि एनआरएनए आइसीसीका सदस्य दिपक कार्कीले जापानमा विद्यार्थीहरुको भविष्य उज्जवल रहेको भन्दै आत्मविश्वास बढाएर अघि वढ्न सुझाव दिनुभयो । कुनै समय ८० जना विद्यार्थीलाई एकसाथ नेपाल पठाउन लाग्दा आफू सहितले संघर्ष गरेर १ जना बाहेक सवैलाई यही राख्न सफल भएको सुनाउँदै विद्यार्थीलाई न्याय र साथ निरन्तर दिने बताउनुभयो । तर दलालहरुबाट भने बच्न आग्रह गर्दै संस्थाले राम्रो कार्य गर्दापनि विरोध गर्नेहरुलाई साधारण सदस्यवाटै निष्काशन गर्ने तयारी भएको बताउनुभयो । समस्यामा परेका नेपाली विद्यार्थीहरुलाई आफूले व्यक्तिगत सहयोग गर्न समेत तयार भएको भन्दै कुनै समस्या भए निर्धक्क राख्न आग्रह गर्नुभयो ।
कार्यक्रममा एनआरएनए जापानका कोषाध्यक्ष कृष्ण गैरे, नेपाली विद्यार्थी समाज जापानका अध्यक्ष अजय राना लगायतले बोल्नुभएको थियो ।
कार्यक्रममा विषयविज्ञहरु भरत नेगी, रमेश पाठक, रमेश बाबु घिमिरे, रञ्जु लामिछाने, चुडामणी कडेँल, काशीराम सापकोटा, पूर्ण गर्बुजा, अर्जुन श्रेष्ठले जापानमा स्वास्थ्यको हेरचाहा र खानापान, यहाँको नियम कानुन, इमिग्रेशन,भिषा अवधि, पार्टटाइम जव, कोठा भाडामा लिनुपर्दाका प्रकृया, मोवाइल सीम खरिद आदिवारे जानकारी दिनुभएको थियो ।
सचिव तेज गुरुङले संचालन गर्नुभएको कार्यक्रममा विद्यार्थीहरुले आ–आफ्नो जिज्ञासा राखेका थिए ।
कार्यक्रमको समापन गर्दै संयोजक दीलीप शर्मा गैरेले यो पहिलो सेसनको कार्यक्रम रहेको र संस्थाले निरन्तर आवश्यकता अनुसार यसरी अन्तरक्रिया कार्यक्रम गर्दै लैजाने बताउनुभयो । कुनै समस्या भए एनआरएनए कान्साइको फेसवुक पेजमा म्यासेज छोड्न सकिने बताउँदै सकेको सहयोग गर्न आफूहरु तयार रहेको जानकारी दिनुभयो ।
