गैँडाकोट । आसन्न स्थानीय तहको निर्वाचन २०७९ का लागि नेकपा एमालेबाट गैँडाकोट नगरपालिकाको मेयरमा ६ र उपमेयरमा ४ जनाले आफ्नो आकांक्षा दर्ता गराउनुभएको छ ।
आज नेकपा एमाले गैँडाकोट नगर कमिटीको विस्तारीत बैठकमा इच्छा हुनेहरुले नाम दर्ता गराउनुभएको हो । बैठक नगर कमिटी अध्यक्ष षडानन्द लामिछानेको अध्यक्षतामा भएको थियो ।
मेयर पदका लागि नगर कमिटी अध्यक्ष षडानन्द लामिछाने, यमुनाथ आचार्य, छत्रराज पौडेल, गोपाल गौतम, रामु कान्त अर्याल र श्रीराम सुवेदीले आकांक्षा व्यक्त गर्नुभएको हो ।
त्यस्तै उपमेयरमा यदुनाथ सिग्देल, चेतना अर्याल,छविकला पाण्डे र गीता तिवारीले आफ्नो नाम दर्ता गराउनुभएको नगर कमिटी अध्यक्ष षडानन्द लामिछानेले घटनाचक्रलाई जानकारी दिनुभयो ।
यो सँगै आजको बैठक पनि सकिएको छ । नगर कमिटीको आजको विस्तारीत बैठक बसेर आकांक्षा व्यक्त गर्नेहरुको नामावली संकलन गरिएको र अव केही दिनमै नगर सचिवालयको बैठक बस्ने लामिछानेको भनाई छ ।
सचिवालय बैठकमा केन्द्रीय कमिटीका नेताहरुको समेत सहभागीता हुने र आकांक्षा राख्नुभएका व्यक्तिहरुसँग घनीभूत छलफल हुनेछ ।
लामिछानेले भन्नुभयो,“अवको छलफलमा आकाक्षिहरुको संख्यालाई साँघुरो घेरा बनाउँदै छलफल गर्छौँ । सकेसम्म दुई तीन जनामा झार्ने जमर्को गर्छौँ । ”
सचिवालय बैठकको निष्कर्ष के आउँछ त्यसपछि जिल्ला कमिटीमा राय सहित नाम सिफारिस गरेर पठाउने उहाँको भनाई छ ।



