चितवन । आगामी स्थानीय निर्वाचनका लागि भरतपुर महानगरपालिका २ को वडा अध्यक्षमा मनोज रानाभाटलाई उम्मेदवार गराउने नेपाली कांग्रेसले निर्णय गरेको छ ।
पार्टीको बुधबार बैठक बसेर वडा सभापति समेत रहनुभएका रानाभाटलाई सर्वसम्मत वडाअध्यक्षको उमेदवार बनाउने निर्णय गरिएको हो । भरतपुरमा गठवन्धनको चर्चा चलेपनि नेपाली काँग्रेसको पकड बन्दै गएकाले काँग्रेसबाट सर्वसम्म वडाअध्यक्षको उम्मेदवार रानाभाटलाई गराउने निर्णय भएको जनाएको छ ।
वर्षौँसम्म भूमिहीन दलितहरुलाई रातो लालपूर्जा काँग्रेस नेतृत्वको गठवन्धन सरकारले उपलब्ध गराएको देखि काँग्रेसको संगठन पनि वडानम्वर २ मा बलियो बन्दै गएकाले यस पटकको वडाअध्यक्षमा एमालेको गढ जस्तै मानिने क्षेत्रलाई तोड्ने गरी रानाभाटलाई वडाअध्यक्ष बनाइएको काँग्रेसले जनाएको छ ।

उम्मेदवार गराउने निर्णय भएसँगै चुनावी प्रचारप्रसारमा लागेको बताउँदै रानाभाटले २०÷२२ वर्ष अगाडि मात्रै यो वडामा काँग्रेसले जितेको तर त्यसपछि कुनै स्थान नपाउँदा यो पटक आफू सहितका काँग्रेसले ठूलो मेहनत गरी संगठन बलियो गराएको र चुनाव जित्ने दाबी गर्नुभयो । अहिले काँग्रेस एक्लै लडेपनि वडानम्वर २ मा जित हासिल हुनेगरी संगठन विस्तार गरेको दावी उहाँको छ ।

यसअघिको निर्वाचनमा यो वडा नेकपा एमालेले जितेको हो। सो समय पाँच सय मतको फरकमा चुनाव जितेको र अहिलेको चुनावमा काँग्रेसले पनि पाँच सय मतकै फरकमा चुनाव जित्ने दाबी रानाभाटको छ । वडामा १८ वटा टोलविकास संस्था रहेको र ती सवैको यथार्थ विश्लेष सहित काँग्रेसले चुनाव जित्ने दाबी रानाभाटको छ । चाँडै आफ्नो प्रतिवद्धतापत्र सार्वजनिक गर्ने रानाभाटले बताउनुभयो ।