डोलराज रानाभाट। चितवनमा सातौँ राष्ट्रिय कृषि गणना २०७८ का लागि छनौट भएका गणक र सुपरीवेक्षकलाई तालिम दिन सुरु गरिएको छ । नारायणी बहुप्राविधिक शिक्षालय भरतपुरमा आजदेखि तालिम सुरु भएको जिल्ला कृषि गणना अधिकृत यज्ञमुर्ति भण्डारीले जानकारी दिनुभयो ।
केन्द्रीय तथ्याङ्क विभागको तालिका अनुसार चैत १ गते जिल्लामा जिल्ला कृषि गणना कार्यालयको स्थापना गरेर तयारी तीव्र पारेको कार्यालयले गणकका लागि ८ र सुपरीवेक्षकलाई ९ दिनसम्म तालिम दिनेछ ।
तालिमको उद्घाटन गर्दै प्रमुख जिल्ला अधिकारी अस्मान तामाङले महत्पूर्ण भूमिका निर्वाह गर्न छनौट हुनुभएको भन्दै गणक र सुपरीवेक्षकलाई राम्रोसँग तालिम लिन र फिल्डमा सही तथ्याङ्क आउनेगरी काम गर्न आग्रह गर्नुभयो । ध्यान लगाएर तालिम लिन अनुरोध गर्दै भोलि फिल्डमा गएर तटस्थ र निष्पक्ष भएर काम गर्न उहाँको सुझाव थियो ।
निर्वाचनका कार्यक्रम समेत हुने भएकाले आफ्नो कार्य जिम्मेवारीपूर्वक गर्न आग्रह गर्दै हतारमा गरे सही तथ्याङ्क नआउनेतर्फ सवै सचेत हुनुपर्ने बताउनुभयो । गणक तथा सुपरीवेक्षकको सुरक्षाका लागि स्थानीय प्रशासन सदैव तयार रहेका तामाङको भनाई थियो । साथै फिल्डमा गएर काम गर्नसक्नेगरी तालिम दिन प्रशिक्षकहरुलाई उहाँको निर्देशन थियो ।
विस २०१८ सालदेखि हरेक १०÷१० वर्षमा कृषि गणना गरिन्छ । संघीयतापछिको यो पहिलो गणना हो । कृषि गणनाको सार, कृषि योजनाको पूर्वाधार भन्ने मूल नारा सहित संघीयतापछिको पहिलो कृषि गणना गर्न गणक र सुपरीवेक्षक वैशाख ६ गतेदेखि जेठ १९ गतेसम्म फिल्डमा खटिनेछन् ।
चितवन जिल्लामा हालसम्म प्राप्त दरवन्दी अनुसार १६ जना सुपरीवेक्षक र ६४ जना गणक गरी कुल ८० जनालाई सो तालिम विभिन्न कक्षमा बाँडेर प्रदान गरिएको भण्डारीले बताउनुभयो ।
केन्द्रीय तथ्याक विभागले वैज्ञानिक विधिबाट छनौट गरे अनुसार चितवनमा १७९ वटा गणना क्षेत्र कायम गरिएको छ । एउटा गणकले ३ वटा गणनाक्षेत्र हेर्नुपर्छ भने एक जना सुपरीवेक्षकले ४ जना गणकको कार्यलाई सुपरीवेक्षण गर्नुपर्नेछ ।
फिल्डमा जाने गणकले राष्ट्रिय कृषि गणना २०७८ अन्तर्गत लगत १, लगत २ र सुपरीवेक्षकले लगत ३ गरी तीन प्रकारका प्रश्नावली भनुपर्ने छ । लगत १ मा गणकहरुले तोकिएको गणना क्षेत्रका सवै घरपरीवारको सुचीकरण गर्नेछन् र सूचीकरण पश्चात नमुना छनौट विधिबाट एउटा गणना क्षेत्रमा औषतमा २० देखि ३० जना कृषक परिवारहरुको मात्रै विस्तृत विवरण लिएर लगत २ मा रहेको मुख्य प्रश्नावली भरिनेछ र लगत ३ मा सामुदायिक प्रश्नावलीहरु भर्नुपर्ने जिल्ला कृषि गणना अधिकृत यज्ञमुर्ति भण्डारीले बताउनुभयो । सोही प्रश्नावली भर्न सहित विविध जानकारी तालिममा दिने बताउनुभयो ।
प्रमुख जिल्ला अधिकारी अस्मान तामाङको अध्यक्षतामा सम्पन्न तालिम उद्घाटन कार्यक्रममा कृषि ज्ञान केन्द्र चितवनका प्रमुख युवराज पाण्डे, प्रमुख कोष नियन्त्रक मणिभद्र न्यौपाने, भरतपुर शिक्षालय प्रमुख सरिता रेग्मी, भेटेरीनरी अस्पताल तथा पशु सेवा विज्ञ केन्द्रका प्रमुख सुशिल केसी,प्रशिक्षक रुद्र अधिकारी लगायतको उपस्थिती थियो ।
