चितवन । नेकपा माओवादी केन्द्रका अध्यक्ष पुष्पकमल दाहाल प्रचण्डले चितवन काँग्रेसले गठवन्धन हुँदैन भनेर केही फरक नपर्ने बताउनुभएको छ ।
चितवन काँग्रेसले त्यसो भनेपनि अहिलेकै गठवन्धन आगामी सवै चुनावसम्म रहने र निर्वाचनमा जाने बताउनुभएको हो ।
स्थानीय चुनावमा अहिलेकै गठवन्धन यथावत रहने प्रष्ट पार्दै आज चितवन आउनुभएका प्रचण्डले भरतपुर विमानस्थलमा कुराकानी गर्दै स्थानीय चुनाव मात्रै नभइ आगामी सवै चुनावमा यही गठवन्धन एक भएर निर्वाचनमा जाने बताउनुभएको हो ।
काँग्रेस एक्लै चुनाव लड्ने तयारीमा छ नि भन्ने प्रश्नमा उहाँले केही व्यक्तिले त्यसो भनेपनि काँग्रेसले गठवन्धन गर्दिन नभनेको भन्दै अहिलेको सत्तासाझेदार दलहरु एक भएर चुनावमा जाने उहाँको भनाई थियो ।
आफ्नो निर्वाचन क्षेत्रमा भएका कार्यक्रममा सहभागी हुन आउनुभएका उहाँले विमानस्थलमा पत्रकारहरुलाई समय भने दिनुभएन । हिँड्दा हिँड्दै गरिएको प्रश्नमा उहाँले सो प्रतिक्रिया दिनुभएको हो ।
