चितवन । दोस्रो संस्करणको राष्ट्रिय महिला फुटबल लिग भोलि देखि हुँदैछ । आज पत्रकार सम्मेलनको आयोजनागरी लिगको तयारी पूरा भएको स्थानीय आयोजक चितवन जिल्ला फुटवल संघ चितवनका अध्यक्ष श्रीकृष्ण कार्कीले जानकारी दिनुभयो ।

यस पटक लिगको पहिलो चरणका खेलहरु चितवनको भरतपुरमा हुँदैछ । लिगको पूर्व प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहालले उद्घाटन गर्नुहुनेछ । लिगका लागि गत फागुन ३ गते अखिल नेपाल फुटबल संघ एन्फा र भरतपुर महानगरपालिकाबीच सम्झौता भएको थियो ।

डबल राउण्ड एण्ड रोबिनको आधारमा हुने लिगको पहिलो चरणका २८ खेलहरु भरतपुर १९ शारदानगर स्थित खेल मैदानमा हुनेछ । पहिलो चरणका खेलहरु चैत ३० गतेसम्म हुनेछ । दोस्रो चरणका २८ खेल बिराटनगरमा हुनेछ । सोही चरणमा विजेता उपविजेता छनौट हुनेछन् । प्रत्येक दिन दुई खेल खेलाइने र दिउसो २ र ४ बजे खेल सुरु हुनेछ ।

उद्घाटनको दिन भोलि एक खेल मात्रै हुनेछ । यसका लागि मैदानमा २ हजार दर्शक क्षमताको अस्थाई प्याराफिट बनाईएको छ । यस पटक लिगमा तीन बिभागीय टोली त्रिभुवन आर्मी क्लब, नेपाल पुलिस क्लब र सशस्त्र प्रहरी बल (एपिएफ) सँगै ८ टिम सहभागी छन् । धनगढी, चन्द्रपुर, विराटनगर, वालिङ र ललितपुर उपमेयर कपबाट महिला लिगका लागि छनौट भएका हुन् । सबै टिमले चार विदेशी खेलाडी खेलाउन पाउनेछ ।

उद्घाटन खेलमा भोलि साबिक विजेता एपिएफ र साबिक उपबिजेता त्रिभुवन आर्मी भिड्नेछन् । खेल दिउँसो ४ बजे सुरू हुनेछ । लिग विजेताले २० लाख रुपैयाँ प्राप्त गर्नेछ भने उपविजेताले १० लाख पाउनेछ ।

तेस्रो हुने टोलीले पाँच लाख तथा चौथोले तीन लाख प्राप्त गर्ने एन्फाले जानकारी दिएको छ । यस्तै फेयर प्ले टिमले एक लाख पाउनेछ । लिगको सर्वोकृष्ट खेलाडीले स्कुटर, उत्कृष्ट गोलरक्षक र उत्कृष्ट स्ट्राईकरले समान ५०/५० हजार तथा उदयमान खेलाडीले २५ हजार प्राप्त गर्नेछन् । हरेक खेलको प्लयर अफ दि म्याचले दश हजार प्राप्त गर्नेछन् ।

सबै टिमलाई तयारीका लागि दश लाख दिने एन्फाकी केन्द्रीय सदस्य पेमा लामाले जानकारी दिनुभयो । तर हालसम्म पनि सो रकम नपाउँदा तयारीमा समस्या भएको खेलाडीहरुको भनाई थियो । ललितपुरकी टीम म्यानेजर सरिला श्रेष्ठले भन्नुभयो,“दिने भनेर पनि हालसम्म पाइएको छैन । हामीलाई खेलाडी व्यवस्थापन र अभ्यासका लागि निकै समस्या छ । अहिले व्यक्तिगत खर्च गरी खेलाडी तयार पारिहेका छौँ । ” लिग सम्पन्न गर्नका लागि दुई करोड ६४ लाख खर्च हुने एन्फाको अनुमान छ । भरतपुर महानगरपालिकाले २० लाख दिने बताएको अध्यक्ष कार्कीको भनाई छ । खेल हेर्नका लागि ५० रुपैयाँको टिकटको व्यवस्था गरिएको स्थानीय आयोजक चितवन जिल्ला फुटबल संघका अध्यक्ष श्री कृष्ण कार्कीले जानकारी दिनुभयो। उद्घाटनको दिन भने नि:शुल्क प्रवेशको व्यवस्था गरिएको उहाँको भनाई छ ।

प्री म्याच कन्फ्रेन्समा कसले के भने ?

महिला लिगको पहिलो खेलमा एपिएफ र आर्मी भिड्दैछ । खेल अघिको प्री म्याच कन्फ्रेन्समा एपिएफकी प्रशिक्षक जमुना गुरुङले सावित्रा खेल्नका लागि फिट रहेको बताउनुभयो । तर गुरुङले पहिलो खेलमा भने उहाँलाई आराम दिने संकेत गर्नुभयो । लिगमा सुखद सुरुवात गर्ने योजनाका साथ मैदान उत्रिने उहाँको भनाइ थियो ।

आर्मीका मुख्य प्रशिक्षक चक्र तामाङले टिमका ११ खेलाडी नै महत्वपूर्ण रहेको बताउँदै भोलि तीन अंकका लागि मैदान उत्रिने बताउनुभएको थियो ।