नवलपुर,गैंडाकोट माघ २३ । नवलपुरको गैंडाकोट ५ मा अवस्थित जनक नमुना माविको विज्ञान प्रयोगशाला भवनको आज शिलान्यास गरिएको छ। सरस्वती पुजाको अवसर पारेर नमुना विद्यालय निमार्ण भइरहेको कांग्रेस चोक नजिकैको चौरमा सो विज्ञान प्रयोगशाला भवनको शिलान्यास भएको हो ।
विद्यालयका संस्थापक,विद्यालय व्यवस्थापन समितिका पूर्वअध्यक्ष,बरिस्ठ समाजसेवी एवम् जग्गादाता परिवारका सदस्य मदनभक्त अधिकारीले भवनको शिलान्यास गर्दै गरिव जनताका छोराछोरीले सहजै गुणस्तरीय शिक्षा पाउने दिन आएको बताउनुभयो । आफूहरुले विस २०२९ सालमा निःशुल्क उपलब्ध गराएको जमिनमा सुविधासम्पन्न भवन सहित गुणस्तरीय शिक्षाको थालनी हुन लागेकोमा खुसी लागेको उहाँको भनाई थियो । आफूहरुले रुखको छहारी खोज्दै पढ्नुपरेको अवस्था सम्झदै उहाँले अहिले सुविधा सम्पन्न भवन बनेकाले विज्ञान सहितको शिक्षा प्राप्तिमा ठूलो सहयोग मिल्ने बताउनुभयो ।
अधिकारीका पिता सुर्यभक्तले ३ विघा जमिन विद्यालयलाई निःशुल्क उपलब्ध गराउनुभएको थियो । अहिले सो जमिनको बीच भागमा सुविधा सम्पन्न दुईवटा शैक्षिक भवन निर्माण भइसकेको वडाअध्यक्ष एवम् विद्यालय व्यवस्थापन समितिका अध्यक्ष नवराज कडेंलले जानकारी दिनुभयो ।
सवै प्रकारका आर्थिक अवस्था रहने परिवारका वालवालिकाले निशुल्क गुणस्तरीय सरकारी शिक्षा हासिल गर्ने वातावरण बनेको भन्दै आगामी शैक्षिकसत्रदेखि कक्षा सुरु हुने बताउनुभयो । विज्ञान प्रयोगशाला निर्माणपछि विद्यार्थीहरुले अन्तर्राष्ट्रिय शिक्षासंग प्रतिस्पर्धा गर्न सक्ने भन्दै नमुना विद्यालय बनाउन जनप्रतिनिधि र नगरपालिकाबाट पनि निरन्तर सहयोग समन्व्य भएकाले यो सम्भव हुँदै गएको जानकारी दिनुभयो ।
शिक्षा विकास तथा समन्वय ईकाइ नवलपरासीका प्रमुख डोलराज पाण्डेले विद्यालय नेपाल अधिराज्यकै नमुना विद्यालय वन्न शुभकामना दिँदै नैतिक शिक्षाका लागि हरेक दिन प्रेरणादायी वचनहरु राख्ने प्रणालीको सुरुवात गर्न सुझाव दिनुभयो ।
पछिल्लो समय विकसीत प्रवधिले विद्यार्थीमा समस्या सृजना भईरेको भन्दै अभिभावकमा समेत यसवारे सचेत गराउनुपर्नेमा जोड दिनुभयो । साधन स्रोतले सम्पन्न भएकाले विज्ञान विषय पढ्नैका लागि गैंडाकोट छोड्नुपर्ने वाध्यताको अन्त्य भएका तर यसको विश्वास विद्यालयले विद्यार्थी र अभिभावकलाई दिलाउनुपर्ने बताउनुभयो ।
अभिभावक संघका अध्यक्ष शंकरनाथ आचार्यले व्यस्थित ल्याव र गुणस्तीय शिक्षा नहुँदा विज्ञान विषय पढ्न भरतपुर काठमाण्डौ लगायतका ठाउँमा जानुपर्ने वाध्यताको अन्त्य हुनेमा आफू विश्वस्त रहेको बताउनुभयो ।
विद्यालयका प्राचार्य चुडामणि शर्मा कडेँलले जिल्लामै धेरै विद्यार्थी रहने जनक मावि रहेको भन्दै आध्यात्मिक सहित वैज्ञानिक शिक्षा प्रदान गर्ने बताउनुभयो । नमुना विद्यालय निर्माण गर्ने गुरुयोजना अनुसारनै विज्ञान प्रयोगशाला बन्ने उहाँको भनाई छ । कक्षा ११ र १२ मा विज्ञान विषय संचालन भइरहेको तर ल्याव अभावले प्रभावकारी नभइरहदा २ करोड ४३ लाख लागतमा २०७९ असोज सम्म यो निर्माण सम्पन्न हुनेछ । तीन तलाको रहने भवनमा फिजिक्स,क्यामेस्ट्री,वायोलजी सहित कम्प्युटर ल्याव पनि हुने उहाँको भनाई छ ।
यसले सामुदायिक विद्यालयले पनि गुणस्तरीय शिक्षा दिन सक्छ भन्ने प्रमाणीत हुने र सोही अनुसार आगामी शैक्षिकसत्रदेखि नयाँ विद्यालयमा पढाई सुरु गर्ने योजना रहेको कडेँलले जानकारी दिनुभयो । नर्सरीदेखि कक्षा १२ सम्म २ हजार विद्यार्थी अध्ययनरत रहेको उहाँको भनाई छ ।
विद्यालय व्यवस्थापन समितिका अध्यक्ष नवराज कडेँलको अध्यक्षतामा भएको कार्यक्रममा सहायक प्रधानाध्यापक मनोजविक्रम विष्टले स्वागत गर्नुभएको थियो भने कार्यक्रम शिक्षक विष्णुप्रसाद रिजालले सहजीकरण गर्नुभएको थियो ।
