चितवन । गैँडाको माउ बच्चा मारेर खाग विक्रि गर्दा १३ जनासम्म संलग्न रहेको खुल्न आएको छ । चितवन राष्ट्रिय निकुञ्जले आज पत्रकार सम्मेलन गरी सो जानकारी दिएको हो। निकुञ्जका सूचना अधिकारी गणेश प्रसाद तिवारीका अनुसार फरारप्रतिवादी मध्येका एक पक्राउ परेका छन् ।
पक्राउ परेका व्यक्तिलाई आज पत्रकार सम्मेलन मार्फत सार्वजनिक गरिएको छ। निकुञ्जका सूचना अधिकारी तिवारीका अनुसार पक्राउ पर्नेमा तनहुँ जिल्ला शक्लागण्डकी नगरपालिका २ कोबेबजार बस्ने कमल गुरुङ्ग रहेका छन् । आबुखैरेनी गाउँपालिका १ सत्रसयमा लुकिछुपि हिडेको अवस्थामा जिल्ला प्रहरी कार्यालय, तनहुँको सहयोगमा निकुञ्जवाट खटिएको टोलीले पक्राउ गरेको तिवारीले जानकारी दिए । गुरुङलाई जिल्ला अदालत नवलपुर पेश गरिएको छ ।
गुरुङ गत वर्षको भाद्र २१ गते निकुञ्जको अमलटारी सेक्टर अन्तर्गत बाँदरझुला टापुको रातोघोल क्षेत्रमा गैँडा मारेर खाग विक्रिमा संलग्न भएको निकुञ्जका अधिकारी तिवारीको भनाई छ ।
उक्त समय सो स्थानमा गैंडाको खाग काटिएको अवस्थामा माउ र बच्चा गरी २ वटा गैंडा मृत अवस्थामा भेटिएको थियो ।
त्यसपछि अनुसन्धान अधिकारी तोकेर निकुञ्जले खोजतलास गर्न थालेको हो। अनुसन्धानका क्रममा माउ वच्चा गैँडा मार्न हालसम्म १३ जना प्रतिवादीहरु संलग्न रहेको खुलेको छ । विभिन्न सांगठनिक तहमा संलग्नता रहेका १३ मध्ये हालसम्म ११ जना पक्राउ परीसकेका छन् । दुई जना अझै फरार रहेको र खोजी कार्य जारी रहेको निकुञ्जका निमित्त प्रमुख संरक्षण अधिकृत राजु घिमिरेले जानकारी दिए ।