चितवन । कोभिड १९ को तेस्रो भेरियन्ट ओमिक्रोनको जोखिम बढेपछि चितवन महोत्सवनको समय छोट्याएर समापन गरिएको छ ।
कोरोना महामारीकै कारण गत वर्ष हुन नसकेको महोत्सव यस वर्ष पुस २५ देखि माघ ४ गतेसम्म आयोजना गरिएको थियो । तर गृहमन्त्रालयबाट मेला महोत्सव रोक्न निर्देशन आएपछि जिल्ला प्रशासन कार्यालय चितवनमा बसेको सर्वदलीय वैठकले जिल्लामा मेला महोत्सव नगर्ने निर्णय भएसँगै बुधवार समापन गरिएको हो ।

१३औँ संस्करणको चितवन महोत्सव समापन गर्दै उद्योग वाणिज्य संघ चितवनका अध्यक्ष राजु श्रेष्ठले अर्को वर्ष १४ औँ संस्करणको चितवन महोत्सव गर्ने घोषणा गरेका छन् ।

“कोरोना महामारीको जोखिमका कारण हामी चौँथो दिनमा महोत्सव समापन गर्दै छौँ,” अध्यक्ष श्रेष्ठले भने ,“अर्को वर्ष हामी १४ औँ संस्करणको महोत्सव गर्नेछौँ।”
पूरा समय महोत्सव गर्न नपाएपछि आयोज संस्था उद्योग वाणिज्य संघ चितवनले स्टल राखेका व्यवसायीहरुलाई ५० प्रतिशत रकम फिर्ता गर्ने निर्णय गरेको छ । करिव १ करोड लागतमा महोत्सव तयारी देखि हालसम्म खर्च भएको र केति घाटा हुने वा नाफा पछि विवरण सार्वजनिक गर्ने आयोजकले जनाएको छ । सम्झौता बमोजिमनै सवै प्रायेजकबाट रकम उठेमा घाटा नहुने आयोजकले जनाएको छ ।
महोत्सवमा ४०० स्टलहरु रहेका थिए । ७ हजारदेखि २५ हजारसम्मका स्टलहरु विक्रि गरिएको थियो । यस पटक चितवनको महलाई बजारीकरण गर्दै मोरी पालन व्यवसाय उकास्न जोड दिँदै महोत्सव परिसरमा मौरीको आकृति समेत बनाएर सजाइएको थियो ।