चितवन,पुस २५ । आजदेखि १३औँ संस्करणको चितवन महोत्सव सुरु भएको छ । माघ ४ गते सम्म चल्ने महोत्सवको उद्घाटन गर्दै बागमती प्रदेशका मुख्यमन्त्री राजेन्द्र प्रसाद पाण्डेले प्रदेश सरकार सीपयुक्त जनशक्ति उत्पादनमा केन्द्रीत रहेको बताउनुभयो । चाँडै प्रदेश सरकारले आवास सहितको व्यवस्था गरी सीप दिने तयारी गरिरहेको बताउनुभयो ।
अध्ययन सकिदासम्म पनि रोजगारी नपाउने अहिलेको अवस्थालाई ध्यान दिएर प्रदेश सरकारले ११९ वटा स्थानीय तहसँग समन्वय गरी कार्यक्रम गर्ने उहाँको भनाई थियो ।
पूर्व प्रधानमन्त्री पुष्पकमल दाहाल प्रचण्डले उद्घाटन गर्ने भनिएपछि उहाँलाई कोरोना संक्रमण भएपछि पाण्डेले महोत्सवको उद्घाटन गर्नुभएको हो । कोरोना कहर पूर्णरुपमा नहटेको भन्दै कोरोना सहित तर स्वास्थय मापदण्डको पालना गरी महोत्सव सफल पार्न सुझाव दिनुभयो ।
महोत्सव उद्घाटनपूर्व र्याली समेत निकालिएको थियो । करिव ५ लाख दर्शकले अवलोकन गर्ने महोत्सवमा ३० करोड वरावरको कारोवार हुने लक्ष्य राखिएको आयोजक संस्था उद्योग वाणिज्य संघका अध्यक्ष राजु श्रेष्ठले जानकारी दिनुभयो ।
नारायणी नदी किनारमा भएको महोत्सवले यस पटक चितवनको महलाई बजारीकरण गर्न मौरीको आकृति बनाएर प्रदर्शनमा राखिएको छ । महोत्सवमा ३५० वटा स्टल रहेका छन् ।
