नवलपुर(गैँडाकोट) । नवलपुरबाट सरुवा भएर जान लाग्नुभएका प्रमुख जिल्ला अधिकारी मनमाया पंगेनी भट्टराईलाई कर्मचारी मिलन केन्द्रले आज विदाई गरेको छ ।
कर्मचारी मिलन केन्द्र नवलपुरका अध्यक्ष मोहन काफ्लेको सभापतित्वमा भएको स्वागत तथा फेरि भेटौँला कार्यक्रम मार्फत पंगेनीलाई विदाई गरिएको हो ।
कार्यक्रममा बोल्दै प्रमुख अतिथि एवम जिल्ला न्यायाधीश अर्जुन अधिकारीले सरुवा नियमित प्रकृया भएको भन्दै जिल्लामा रहदा विवाद रहित सेवा दिन सकेको भन्दै जहाँगएपनि सेवाग्राहीमैत्री सेवामा लाग्न शुभकामना दिनुभएको थियो ।
कार्यक्रममा उपस्थित भएका कर्मचारीहरुले आगामी कार्यकालको शुभकामना दिँदै मायाको चिनो प्रदान गरि विदाई गरिएको स्वास्थ्य कार्यालय नवलपुरका प्रमुख केशव चापागाईले जानकारी दिनुभयो ।
कार्यक्रममा बोल्दै सीडीओ पंगेनीले नवलपुरको १७ महिने बसाई राम्रो रहेको र सबैको सहयोग मिलेको भन्दै सवैलाई धन्यवाद दिनुभएको थियो ।
सीडीओ पंगेनी २०७७ भाद्र २२ गते देखी हाल सम्म नवलपरसी (ब.सु.पू.) को प्रमुख जिल्ला अधिकारीको जिम्मेवारीमा रहनुभएको हो।
यही पौष २० गतेको नेपाल सरकारको निर्णयले गण्डकी प्रदेश सरकारका मुख्यमन्त्री तथा मन्त्रिपरिषदको कार्यालय गण्डकी प्रदेश पोखराको सचिवमा पंगेनीको सरुवा भएको हो ।
