चितवन । आज तमू ल्होसार पर्व २०७८ अर्थात गुरुङ समुदायको नयाँ वर्ष पनि । यो वर्ष गाई वर्गलाई विदाई गरी बाघ वर्षलाई स्वागत गरिदैछ ।
चितवनमा पनि आज विशेष कार्यक्रम सहित यो पर्व मनाइदैछ । तमू ह्युल छोँज् धीँ गुरुङ राष्ट्रिय परिषदको आयोजनामा सांस्कृतिक प्रतियोगिता सहित यो वर्षको तमू ल्होसार भव्यताका साथ मनाइने अध्यक्ष गणेश गुरुङले जानकारी दिए ।
कोरोना महामारीका कारण गत वर्ष स्थगित पर्व यो पटक भव्यरुपमा मनाउन १४ वटा उपसमिति बनाएर तयारी तीव्र पारिएको थियो। विगतमा २४,२५ वटा उपसमिति बनाएर पुष १३ देखिनै विभिन्न कार्यक्रमगरी मनाउदै आएपनि कोभिड महामारीको जोखिमले यस पटक पुष १५ गते मात्रै पर्व मनाइने आयोजकले जानकारी दिएको छ ।
यो पटक गुरुङ समुदायको भाषा, संस्कृति र संस्कारको संरक्षण गर्न तमू ल्होसार पर्व मनाइने भएको हो । भरतपुरको महावौद्द गुम्बा तीनखोले भरतपुरमा पर्व मनाइने परिषदका अध्यक्ष एवम तमू ल्होसार पर्व मूल समारोह समिति २०७८ का अध्यक्ष गणेश बहादुर गुरुङले जानकारी दिए।
चितवन जिल्लाभरका गरी करिव १५ समूहको प्रतियोगितामा सहभागीता हुने र अहिले सम्म १० समूहले नाम दर्ता गराइसकेका छन् । प्रतियोगितामा प्रथम हुनेलाई १० हजार, द्धितीय हुनेलाई ७ हजार, तृतीय हुनेलाइ ५ हजार र सान्तवता हुने दुइ समूहलाई २÷२ हजारका दरले पुरस्कृति गरीने गुरुङले जानकारी दिए ।
आज नै जयबुद्ध अस्पतालको सहयोगमा निशुल्क स्वास्थ्य परीक्षण समेत गरिने आयोजकले जानकारी दिएको छ । साथै सोही दिन जयवुद्ध अस्पतालको सहयोगमा निशुल्क स्वास्थ्य परीक्षण, छेलो फ्याँक्ने,रस्साकस्सी,घैँटो फुटाई प्रतियोगिता समेत आयोजना गरिएको आयोजकले जनाएको छ। तयारीस्वरुप गुम्बामा सजिसजावट र लुङ्दा टाँग्ने कार्य समेत गरिनेछ ।
सो अवसरमा विभिन्न राजनीतिक दलको नेतृत्व तहमा गुरुङ समुदायबाट पुग्नुभएका व्यक्तिहरुलाई सम्मान समेत गर्ने कार्यक्रम रहेको सचिव भैँखु गुरुङले जानकारी दिइन् कार्यक्रम सम्पन्न गर्न १ लाख ४३ लाख रुपैया लाग्ने अनुमान गरिएको छ । कार्यक्रमको बागमती प्रदेशका उद्योग वाणिज्य तथा आपूर्ति मन्त्री मिलनबाबु श्रेष्ठले उद्घाटन गर्नेछन्। यसैविच सरकारले आज देशभर सार्वजनिक विदा दिएको छ।
