नवलपुर (देवचुली) । संचारकर्मी तथा पत्रकार संघ नवलपुरको साधारण सभा सम्पन्न भएको छ । साधारण सभाको अवसरमा आज वनभोज तथा मित्रमिलन कार्यक्रमको समेत आयोजना गरिएको थियो ।
अध्यक्ष खगराज सापकोटाको जन्मदिन समेत रहेकाले आज जिल्लाका पत्रकार तथा संचारकर्मीको उपस्थितीमा कार्यक्रम सम्पन्न भएको हो। आन्तरिक पर्यटकहरुलाई आकर्षित गराइरहेको देवचुली नगरपालिका वडानम्वर ९ मा अवस्थित घुमाउरी सामुदायिक वनमा कार्यक्रम भएको हो । पछिल्लो समय वनभोज कार्यक्रमका लागि उत्कृष्ट स्थान वन्दै गइरहेको ठाउँको समेत प्रचारमा कार्यक्रमले सहयोग गर्ने र यसले आन्तरिक पर्यटक बढाउन मद्दत मिल्ने संचारकर्मी तथा पत्रकार संघ नवलपुरका अध्यक्ष खगराज सापकोटाले बताए ।
साथै कार्यक्रमले जिल्लाका पत्रकारहरुवीच परिचय आदनप्रदान र परेको समस्यावारे वहस छलफल गर्न सघाउने बताउँदै हरेक वर्ष यसरी कार्यक्रम गर्दै आएको सापकोटाको भनाई थियो ।
कार्यक्रममा बोल्दै नेपाल पत्रकार महासंघ गण्डकी प्रदेश समितिका अध्यक्ष नारायण शर्माले वर्षेनी गरिने कार्यक्रमले जिल्लाका नयाँ तथा पुराना पत्रकारवीच घुलमिल हुन सहयोग मिलेको र यसले भातृत्व सँगै सम्वन्ध प्रगाढ गराउन मद्दत मिलेको बताए ।
जो जहाँ भएपनि वर्षको एक दिन एकै ठाउँमा जम्मा हुन सहयोगीको भूमिका खेलको यो कार्यक्रमले सवैलाई आफ्नो अनुभव साटसाट गर्न र रमाइलो गर्न सहयोग पुगेको बताए । त्यस्तै कार्यक्रममा नेपाल पत्रकार महासंघ नवलपुरका अध्यक्ष वीरेन्द्र पराजुलीले नवलपुरका पत्रकारहरुको पर्व जस्तै वनेको यो कार्यक्रमले एकअर्कावीच चिनजान गर्न सहयोग पुगेको भन्दै सफलताको कामना गरे ।
कार्यक्रममा कोष स्थापना गर्न आर्थिक सहयोग गरेको योगप्रसाद शर्मालाई सम्मान गरिएको थियो । कार्यक्रममा बोल्दै शर्माले दुरदराजका जनतालाई सूचना पुर्याउन निरन्तर खट्ने पत्रकारहरुको कार्यक्रममा सहभागी हुन पाएको भनदै खुशी व्यक्त गरे। साथै आगामी दिनमा समेत सहयोग गर्ने उनको भनाई थियो।कार्यक्रम अर्जुन सापकोटाले सहजीकरण गरेका थिए ।
