नवलपरासी । विहान पैदल हिँडीरहेका व्यक्तिहरुलाई सवारीले ठक्कर दिँदा एक जनाको मृत्यु भएको छ । दुर्घटनामा परी अन्य ३ जना घाइते भएका छन् । पश्चिम नवलपरासीको सदरमुकाम परासीमा ठक्करबाट रामग्राम नगरपालिका वार्ड नम्बर ३ परासीकी कमला रेश्मीको घटना स्थलमै मृत्यु भएको र सोही गाडीले ठक्कर दिदा अन्य ३ जना घाईते भएको जिल्ला प्रहरी कार्यालयल नवलपरासीका सुचना अधिकृत प्रहरी नायब उपरिक्षक प्रेम बहादुर शाहीले बताए । अन्य घाइतेको उपचार भइरहेको प्रहरीले जनाएको छ।
मृतक महिला नेपाल पत्रकार महासंघ पश्चिम नवलपरासीका सचिव राजकुमार रेश्मीकी श्रीमती हुन् । उनको आइतबार नै अन्तिम संस्कार गरिएको छ ।
आईतवार विहानको समयमा जिल्ला सदरमुकाम परासीदेखि सुनवलतर्फ जादै गरेको लु २ ख ४०५५ नम्बरको बसले पदैल यात्रुहरुलाई पछाडिबाट ठक्कर दिएको थियो ।
दुर्घटनामा परी रामग्राम ३ निवासी २७ बर्षीया अस्मिता गैह्रे, चितवनको राप्ती नगरपालिका ६ निवासी ४५ बर्षीय शिवप्रसाद राई र सुनवल नगरपालिका २ निवासी ३७ बर्षीया अर्जुन ढकाल घाइते भएका छन् ।
ठक्कर दिने बस र बस चालक प्रहरी नियन्त्रणमा रहेका छन् ।
