चितवन । बरिष्ठ गायक तथा संगितकार दीप श्रेष्ठ अंग्रेजी नयाँ वर्ष सन् २०२२ लाई स्वागत गर्न चितवन आउने भएका छन् । उनी चितवन भरतपुर ६ मा रहेको लेक ट्वान्टी थाउजेण्ड फारम एण्ड रिट्रीट (हवेली) देवनगर चम्पानगरमा आउने भएका हुन् । त्यहाँ उनको एकल साँझ हुने र नयाँ वर्षलाई स्वागत गरिने कार्यक्रम रहेको हो ।
साँझ ५ बजेदेखिनै गायक दीप श्रेष्ठको प्रस्तुती रहने हवेलीका संचालक देभेन लोहनीले जानकारी दिए । कोभिड महामारीको समयमा संक्रमणबाट मृत्युको मुखमा पुगेर निको भएका श्रेष्ठले चितवनमा पहिलो पटक लाइभ प्रस्तुती दिने भएका हुन् ।
मृत्युलाई जितेर आएको भन्दै उनले उक्त कार्यक्रममा सहभागी हुन आग्रह गरे । “आशा छ मलाई माया गर्ने सवै आउनुहुन्छ । करिव १८ देखि २० वटा गीत गाउनेछु ।” आफूले स्वास्थ्य लाभ लिएपछि पुन सांगितिक यात्रामा आफू रहेको श्रेष्ठले बताए ।
आगामी दिनमा पुराना गितहरुलाई पुन रि–रेकर्ड गरेर बजारमा ल्याउने उनको भनाई छ । करिव २२ वटा गीत गजलहरु गाउन तयार पारेको श्रेष्ठले बताए । त्यस्तै अन्य गायकहरुलाई पनि कम्तिमा सीडीमा गीत रेकर्ड गर्न आग्रह सहित लाइव्रेरी बनाउन सुझाव दिए ।
उक्त कार्यक्रममा सहभागी हुन टिकट विक्रि सुरु भएको र प्रति टिकटको रु. २ हजार रुपैयाँ कायम गरिएको लोहनीले जानकारी दिए ।कार्यक्रममा सहभागी हुन भरतपुर सहित नवलपुर, मकवानपुर बाट समेत दर्शकहरु आउने उनको भनाई छ । टिकट विक्रि भइरहेको लोहनीले बताए ।
संगितकार सुवोध प्रधानका अनुसार टुवोर्ग प्रीजेन्ट् संगितान्जली दीप श्रेष्ठ एण्ड व्याण्ड म्युजिकल लाइट नाम दिएर कार्यक्रम हुनेछ । उक्त कार्यक्रममा बरिष्ठ कलाकार गौरी मल्ल, वेली डान्सर विनु शाक्य,गायिका अन्जना राइको समेत विशेष प्रस्तुती रहनेछ ।
कार्यक्रममा करिव १५ सय बढीको उपस्थिती हुने बताइएको छ ।
