काठमाडौं । नेपाली काँग्रेसको नयाँ नेतृत्व हाँक्न ६ जनाले उम्मेदवारी दर्ता गराएका छन् । १४ औँ महाधिवेशनले एक जना सभापति पदका लागि आवश्यक पर्नेमा ६ जनाले उम्मेदवारी दर्ता गराएका छन् ।
जसमा वर्तमान सभापति शेरबहादुर देउवासहित ६ जना रहेका हुन् । देउवासँगै विमलेन्द्र निधि, शेखर कोइराला, प्रकाशमान सिंह, कल्याण गुरुङ र युवराज न्यौपानेले सभापतिमा मनोनयन दर्ता गराएका हुन् ।
संस्थापनइतरबाट साझा उमेदवार तय गर्न रामचन्द्र पौडेलसहितका नेताहरु असफल भएपछि विमलेन्द्र निधि, शेखर कोइराला, प्रकाशमान सिंहले छुट्टाछुट्टै उमेदवारी दिएका हुन् । अव उम्मेदवारी फिर्ताको समय कसैले लिए भने केही कम होला अन्यथा ६ जना सभापतिमध्य प्रतिनिधिहरुले एक जनालाई चुन्न पर्नेछ । काँग्रेसको चौँधौँ महाधिवेशनमा ४ हजार ७४३ जना मतदाता रहेका छन् ।
देउवा प्यानलबाट उपसभापतिमा विजय गच्छदार र पूर्णबहादुर खड्का, महामन्त्रीमा डा. प्रकाशशरण महत र प्रदीप पौडेल उम्मेदवार भएका छन् ।
देउवा समूहबाट महिला कोटाको सहमहामन्त्रीमा महालक्ष्मी उपाध्याय डिना (मकवानपुर), आदिवासी जनजातितर्फको सहमहामन्त्रीमा भीष्मराज आङ्देम्बे (पाँचथर), दलितर्फको सहमहामन्त्रीमा मानबहादुर विश्वकर्मा (अर्घाखाँची), मधेशीतर्फको सहमहामन्त्रीमा महेन्द्र यादव (धनुषा), खस आर्यतर्फको सहमहामन्त्रीमा किशोरसिंह राठौर (बर्दिया), थारु तर्फको सहमहामन्त्रीमा उमाकान्त चौधरी (बारा), मुस्लिमतर्फको सहमहामन्त्रीमा फरमुल्लाह मन्सुर (बारा) र पिछडिएको क्षेत्रको सहमहामन्त्रीमा जीवनबहादुर शाही (हुम्ला) उम्मेदवार बनेका छन् ।
शेखर कोइरालाको प्यानलमा उपसभापतिमा धनराज गुरूङ र चन्द्र भण्डारी, महामन्त्रीमा मिनेन्द्र रिजाल र गगन थापाले दर्ता गराएका छन् भने सहमहामन्त्रीमा खस आर्यबाट देवराज चालिसे, महिलाबाट कमला पन्त, दलितबाट जीवन परियार, मधेसीबाट रामकृष्ण यादव, मुस्लिमबाट शेख वकिल, पिछडिएको क्षेत्रबाट बद्री पाण्डे, आदिवासी जनजातिबाट विकास लामा र तेजुलाल चौधरीले उम्मेदवारी दिएका छन् ।
प्रकाशमान सिंहले सभापतिमा उम्मेदवारी दिएका छन्। उनको समूहबाट उपसभापतिमा सुजाता कोइराला र महामन्त्रीमा विश्वप्रकाश शर्मा छन्।
