चितवन । युवा नेता गगन थापाले नेपाली काँग्रेसको १४औँ महाधिवेशनमा महामन्त्री पदमा उम्मेदवारी रहने बताएका छन् । हिजो एक भेला गरी उम्मेदवारी दिने बताए ।
‘समुन्नत नेपाल र सम्मानित नेपाली’ को राजनीतिक लक्ष्य प्राप्तिका लागि नेपाली कांग्रेसमा पुनर्जागरण र रूपान्तर गर्नुपर्ने प्रस्ताव अघि सार्दै त्यसैका लागि आफू महामन्त्रीमा आउनुपर्ने बताए। कांग्रेसले चुनाव किन जित्नुपर्छ, जितेपछि के हुन्छ भन्ने प्रश्नको जवाफ कांग्रेसको अस्तित्वसँग जोडिएको छ भन्दै परिवर्तनका लागि पार्टीको मूल नेतृत्व जनताले विश्वास र भरोसा गर्ने खालको हुनुपर्ने बताए ।
काँग्रेससँग प्रश्न भन्दा उत्तर हुनुपर्ने बताएका उनले आफ्नो राजनीतिक उमेरसम्म कति गर्न सक्छु निस्वार्थ सेवा गर्ने बताए ।
उम्मेदवारी घोषणा गर्दै उनले बिहीबार अवधारणापत्र सार्वजनिक गरेका छन् । राजनीतिक परिवर्तन पटक–पटक भए पनि त्यसको प्रतिफल जनतामा सही रूपका पुर्याउन नसक्दा व्यवस्थाप्रति नै प्रश्न उठ्न थालेको भन्दै उनले आफूले महामन्त्री जितेमा चार वर्षमा परिवर्तित कांग्रेस निर्माण गर्ने दाबी गरे ।
फोटो ः पत्रकार विकास कार्कीको फेसवुकबाट
उनले घुमाउरो ढंगले आफू महामन्त्रीमा जितेर मात्र नहुने, पार्टी सभापति पनि त्यत्तिकै उपयुक्त चाहिने बताए । उनले सामाजिक लोकतन्त्रको सैद्धान्तिक खाका १५ वटा बुँदामा पेस गरे । पार्टीमा सभापति नै प्रमुख व्यक्ति हुने भएकाले नेतृत्व कमजोर भएमा आफूले महामन्त्री जिते पनि लक्ष्यअनुसार काम गर्न कठिन हुने उनले बताए ।
काँग्रेसको १४औँ महाधिवेशन आजदेखि सुरु हुँदैछ । भृकुटीमण्डपमा दिउसो १ बजे उद्घाटन गरिने भएको छ ।
