चितवन,मंसिर १५ । चितवनमा काँग्रेसको अधिवेशन गराउन जिम्मेवारी लिइ आएका कमलमोहन पोखरेलले राजीनामा दिएका छन् । उनले राजीनामा दिएसँगै चितवनमा जिल्ला अधिवेशन अनिश्चित बनेको भन्दै सभापतिका उम्मेदवार सहित प्रतिनिधिहरुले विज्ञप्ती जारी गरेर सुनिश्चित गर्न माग गरेका छन् ।
सभापति पदका उम्मेदवार कैलाश कोइराला, क्षेत्रीय सभापति भरत लामिछाने लगायत महाधिवेशन प्रतिनिधिहरुको समेत हस्ताक्षर गरी चाँडै जिल्ला अधिवेशन गर्न माग गरिएको हो । सभापति पदका उम्मेदवार कैलाश कोइराला सहित १४ जनाले संयुक्त हस्ताक्षर गरी जिल्ला अधिवेशन सुनिश्चत गर्न माग गरिएको हो ।
काँग्रेसको १४औँ महाधिवेशन अन्तर्गत चितवनमा वडा, पालिका, प्रदेश तथा क्षेत्रीय अधिवेशनहरु सम्पन्न भइसकेका छन् । मंसिर १० र ११ गते जिल्ला अधिवेशन गर्ने गराउने भनिएपनि नेकपा एमालेको १०औँ महाधिवेशनका कारण सारिएको थियो । तर सारिएको मितिमा समेत अधिवेशन हुने निश्चित नदेखेपछि उनीहरुले आज प्रेस विज्ञप्ति मार्फत जिल्ला अधिवेशनको माग गरेका हुन् ।
मंसिर १२ गते जिल्ला कार्यसमितिको बैठक बसेर सभापति जितनारायण श्रेष्ठले मंसिर १४ गते मनोनयन र १८ गते मतदानको प्रस्ताव गर्दा समेत प्रदेश अधिवेशन अगावै जिल्ला अधिवेशन गर्नुपर्ने आफूहरुको प्रष्ट दृष्टिकोण रहेको जनाइएको छ ।
त्यसपछि पुन जिल्ला कार्यसमिति र आकाक्षिहरुवीच बैठक बसेर मंसिर १५ गते मनोनयन र २१ गते मतदान गर्ने मिति सिफारिस भएको थियो । पटक पटक मिति सार्ने र स्थगित हुने भएपछि अहिले मुख्य निर्वाचन अधिकृत कमलमोहन पोखरेलले समेत राजीनामा दिएका छन् । उनले आफू अस्वस्थ्य भएका कारण अवका अधिवेशन गराउन नसक्ने राजीनामा पत्रमा उल्लेख गरेपनि भित्रि कारण भने पटक पटकको मिति घोषणा र स्थगितनै रहेको उनीहरु बताउँछन् ।
मुख्य निर्वाचन अधिकृतले समेत राजीनामा दिएपछि जिल्ला अधिवेशन अनिश्चित बनेको भन्दै पार्टी अधिवेशन नगर्ने र तदर्थवादमा संचालन गर्न खोजिएको भन्दै विरोध जनाइएको छ ।