काठमाण्डौ । कि राजीनामा कि महाअभियोग यी दुई उपायबाट सर्वोच्च अदालतको प्रधानन्यायाधीश हटाउन मिल्छ । राजनीतिक दलहरु त्यति खुलेर यो विवादवारे बोलेका छैनन् । तर नेपाल बार एशोसियशनले भने पाँच दिनभित्र राजीनामा दिन अल्टिमेटमनै दिएको छ।

कानून व्यवसायीहरुको छाता संस्था नेपाल बार एशोसिएसनले शुक्रबार कार्यसमितिको बैठकबाट दबावमुलक आन्दोलन घोषणा गरेको हो । आइतबारदेखि बुधबारसम्म बिहान १० देखि ११ बजेसम्म कालो पट्टी बाँधेर सर्वोच्चमा विरोध कार्यक्रम गर्ने र १६ गते बारको प्राङ्गणमा धर्ना तथा विरोध सभा गर्ने बारको निर्णय छ ।

बार महासचिव लीलामणि पौडेलका अनुसार आफू उपर यत्रो प्रश्न उठेपछि सम्माननीय प्रधानन्यायाधीश जस्तो व्यक्तिले अस्तिकै दिन राजीनामा दिइसक्नु पर्ने थियो । नदिनु भएकाले यो कार्यक्रम घोषणा गर्नु परेको हो ।