काठमाण्डौँ । कार्तिकमा प्राय सीमसीम पानी पर्दथ्यो । तर लगातार जस्तै केहीदिनअघिको वर्षाका कारण आएको बाढीपहिरो र डुबानमा परेर हालसम्म १११ जनाको मृत्यु भएकोछ ।
बाढीपहिरोमा परी प्रदेश १ मा ६५, सुदूरपश्चिम प्रदेशमा ३२, कर्णाली प्रदेशमा ७, लुम्बिनी प्रदेशमा ४, गण्डकी प्रदेशमा २ र बागमती प्रदेशमा १ जनाको मृत्यु भएको हो ।
प्रहरी प्रधान कार्यालयका अनुसार उक्त घटनामा ३७ जना अझै बेपत्ता छन् ।
मुलुकभर गरेर कुल ४२ जना घाइते भएको प्रहरीले जनाएको छ । बाढीपहिरामा परी प्रदेश १ मा ११, २ मा एक, लुम्बिनी र कर्णाली प्रदेशमा एकरएक र सुदूरपश्चिम प्रदेशमा २३ गरी ३७ जना बेपत्ता भएका जनाइएको छ ।
बेपत्ताको खोजीकार्य जारी छ । बाढीको कारण दुई हजार २३२ वटा घर डुबानमा परेका छन् । ७८ घर, १६ गोठ, छ वटा पुल, एक विद्यालय र तीन सरकारी कार्यालयमा क्षति पुगेको छ । कुल १८६ वटा पशु चौपाय मरेको जनाइएको छ ।
उक्त अवधिमा एक हजार १८८ घरपरिवार विस्थापित भएका छन् ।
प्रधानमन्त्री शेरवहादुर देउवाले अति प्रभावित क्षेत्रको अवलोकन गर्दै तत्काल राहत,उद्दार तथा पुनस्थापनामा जुट्न निर्देशन दिनुभएको छ ।
