चितवन। भरतपुर महानगरपालिकाको ७० र चितवन उद्योग संघको ३० प्रतिशत लागत साझेदारीमा ५६ लाखमा नेपालमै पहिलो औद्योगिक पाठशाला कक्षको निर्माण गरिएको छ । कक्षको आज उद्घाटन गरिएको छ । उद्घाटन गर्दै भरतपुर महानगरप्रमुख रेनु दाहालले स्थानीय सरकार सधैँ निजी क्षेत्रसँग समन्वय र सहकार्य गर्न तयार रहेको बताउनुभयो ।
उद्योग संघमा स्थापना भएको पाठशाला कक्षले नयाँ र दक्ष उद्योगी स्थापना गराउन सहयोग पुग्ने बताउँदै उद्योग संघकै कारण महानगरको राजश्व १ अर्व पुगेको बताउनुभयो । महानगर कायमै हुन पाँच वर्षमा १ अर्ब राजश्व पुग्नै पर्दथ्यो उहाँले भन्नुभयो, जुन लक्ष्य उद्योग संघको महत्वपूर्ण सहयोगले लक्ष्य हासिल गरेर पनि माथि पुगेका छौँ । ”
चितवनमा रहेका १२ सय उद्योगहरु मध्ये ५० प्रतिशत बढि महानगरभित्र रहेको भन्दै पाठशालाको भरपुर प्रयोग गर्न आग्रह गर्नुभयो । आज नै वेवसाइटको समेत उद्घाटन गरिएको छ । वेवसाइट निर्माणको कार्य पूरा हुन भने तीन महिना लाग्नेछ ।
भरतपुर महानगरपालिकाको विशेष सहयोगमा पाठशालाको निर्माण गरिएको अध्यक्ष राजु पौडेलले जानकारी दिनुभयो । यो अभ्यास नेपालमै पहिलो भएको समेत उनको भनाई छ । पाठशाला स्थापना पछि मानसिक सम्पतीको विकास गर्न थप टेवा पुग्ने अध्यक्ष पौडेलको भनाई थियो ।
एसी सहितका तीन वटा व्यस्थित तालिम हल पाठशालामा रहेका छन् । कुनै औपचारिक पाठ्यक्रम नभई अनुभविहरुबाट तालिम र शिक्षा प्रदान गर्ने उद्देश्य रहेको संघले जानकारी दिएको छ ।
कार्यक्रममा उपप्रमुख पार्वती शाह ठकुरी, उद्योगी व्यवसायीको उपस्थिती रहेको थियो ।
५६ लाखको लागतमा पाठशाला निर्माण भएकोमा ७० प्रतिशत भरतपुर महनगर र ३० प्रतिशत उद्योग संघको लगानी रहेको छ । वेवसाइट १४ लाख १६ मा बन्ने र ९० प्रतिशत महानगर र १० प्रतिशत संघले व्यहोर्नेछ । वेवसाइट निर्माण पूरा हुन ३ महिना लाग्ने छ भने पाठशालाका लागि तालिम हलहरु पूर्ण तयारी अवस्थामा रहेको र पाठ्यक्रम निर्माण गरी संचालन गरिने संघका कार्यकारी निर्देशक गणेशप्रसाद तिमिल्सेनाले जानकारी दिनुभयो ।
