चितवन, असोज १२ । आफैले प्रहरीमा जाहेरी लेखाई त्यसैको आधारमा रकम माग गरेको आरोपमा चितवन प्रहरीले कानुन व्यवसायीलाई पक्राउ गरेको छ ।
जिल्ला प्रहरी कार्यालय चितवनका अनुसार पक्राउ पर्नेमा कालिका नगरपालिका ५ पदमपुर बस्ने बर्ष ५० का रामचन्द्र देबकोटा रहेका छन् । उनी आफैले नागरिकताको विषयमा जाहेरी दरखास्त लेखि प्रतिवादीको रुपमा उल्लेख गरिएका व्यक्तिसंग रकम माग गरेको प्रहरीको भनाई छ । ‘पटक पटक फोन सम्पर्क गरी तपाईको नाममा जिल्ला प्रहरी कार्यालय चितवनमा जाहेरी दरखास्त परेको छ, उक्त जाहेरी दरखास्त दर्ता नगराई मुद्दा मिलाई दिन्छु भनि रकम माग गरेको सूचना आयो’ प्रहरीले भनेको छ ।

काननु व्यवसायी देबकोटालाई असोज १० गते नियन्त्रणमा लिई प्रारम्भिक अनुसन्धानको क्रममा प्रतिवादीको रुपमा उल्लेख गरिएका व्यक्तिसंग पटक पटक फोन सम्पर्क गरि रकम माग गरेको देखिएको पनि चितवन प्रहरीले जनाएको छ ।

उनी बिरुद्ध ठगी उद्योगमा चितवन जिल्ला अदालतबाट म्याद अनुमति लिई थप अनुसन्धान कार्य भई रहेको चितवन प्रहरीले जानकारी दिएको छ ।