भदौ २४ । देशमा भ्रष्टचार बढ्दै गएको र त्यसको संरक्षणमा सरकार आफै लागेको भन्दै नयाँ पुस्ता अर्थात् जेनजीले हिजो भदौ २३ देशभर बृहत प्रदर्शन गरेका छन् ।
भ्रष्टचार नियन्त्रण गर्न माग गरेका युवाहरुलाई भने सरकारले गोली बर्षाएको छ । जसका कारण काठमाण्डौ र देशका अन्य भाग सहित गरी १९ जनाले ज्यान गुमाएका छन् । आन्दोलनको भीड नियन्त्रणको सामान्य नियमपनि पालना नगरी सरकारले बर्बरता गरेको हो ।
स्वास्थ्य तथा जनसंख्या मन्त्रालयले देशभरका विभिन्न अस्पतालबाट लिएको विवरण अनुसार, मृतकको संख्या १९ पुगेको हो । त्यस्तै, देशभर विभिन्न अस्पतालमा ४ सय २२ जना घाइते उपचाररत छन् ।
काठमाडौंको सिभिल अस्पतालमा ३, राष्ट्रिय ट्रमा सेन्टरमा ८, एभरेष्ट अस्पतालमा ३, केएमसी अस्पतालमा २, त्रिवि शिक्षण अस्पतालमा १, विपि कोइराला स्वास्थ्य विज्ञान प्रतिष्ठानमा २ जनाको मृत्यु भएको स्वास्थ्य मन्त्रालयले जनाएको छ । त्यस्तै काठमाडौै बाहिर सुनसरीको इटहरीमा प्रहरीको गोली लागेर २ जनको मृत्यु भएको छ ।
काठमाडौ बाहिरका धेरै सहरहरुमा जेनजीहरुले प्रदर्शन गरेका थिए । त्यसविरुद्ध सरकारले दमन गरेको थियो ।
नयाँ बानेश्वरस्थित संसद् भवन अगाडि प्रदर्शनकारीहरुले घेरा तोडेपछि आन्दोलनकारी र प्रहरीबीच झडप भएको थियो । झडपमा प्रहरीले अन्धाधुन्ध गोली प्रहार गरेको थियो । त्यसक्रम घाइते भएकाहरुलाई प्रदर्शनकारीहरुले अस्पताल पुर्याएका थिए । कतिपयको बाटैमा र कतिको अस्पतालमा उपचारका क्रममा निधन भएको थियो ।
प्रहरीले न्युनतम संयमता पनि गुमाएर प्रदर्शनकारीमाथि आक्रमण गरेको थियो । त्यसक्रममा निजामती अस्पतालभित्रै पसेर प्रहरीले आन्दोलनकारीमाथि आक्रमण गरेको थियो। डाक्टरहरुलाई समेत अश्रु ग्यास लागेको थियो ।
‘भ्रष्टलाई जवाफदेही बनाउन,सरकारमा पारदर्शीता सुनिश्चित गर्ने र प्रशासनिक प्रणालीलाई साँच्चै कानुनी र राजनीतिक हस्तक्षेपविहीन बनाउने ताकि भ्रष्टचारलाई निष्प्रभावी पार्न सकियोस् र न्याय, शान्ति र विकास होस्’ भन्ने मूख्य उद्देश्य रहेको जेनजी मुभमेन्ट नेपालले जनाएको थियो ।
आन्दोलन शान्तिपूर्ण, अनुशासित र कानुनी हुनेछ भन्दै हिँसा तोडफोड हुने छैन भनिएको थियो । तर आन्दोलनमा घुसपैठ भएको भनिएको छ ।
