भदौ १३,गैँडाकोट । गोरुको अवैध ओसारपसारमा संलग्न रहेको भन्दै ट्रक र चालकलाई नियन्त्रणमा लिइएको छ ।
जिल्ला प्रहरी कार्यालय नवलपरासीका सूचना अधिकारी प्रहरी नायव उपरीक्षक वीर दत्त पन्तले जानकारी दिनुभयो ।
हिजो बर्दघाट नगरपालिका ४ टिसियन चोकमा इलाका प्रहरी कार्यालय बर्दघाटले चेकजाँच गर्दा ट्रक र चालकलाई नियन्त्रणमा लिइएको हो ।
पश्चिमबाट पूर्वतर्फ जाँदै गरेको ना ६ ख ९९७७ नम्वरको ट्रक र त्यसभित्र राखिएको १८ वटा गोरु नियन्त्रणमा लिइएको हो ।
निर्दयी रुपमा ट्रकभित्र गोरु ल्याएको र १८ मध्ये एउटा भने मृत रहेको प्रहरीको भनाई छ । प्रहरीका अनुसार ट्रक चालक मकवानपुर हेटौडा उप महानगरपालिका १९ बस्तिपुरका २८ बर्षीय तोयनाथ शिवाकोटीलाई नियन्त्रणमा लिइएको हो । जिवित गोरुहरुलाई सुनवल नगरपालिका ३ किर्तिपुर स्थित कामधेनु गौशालामा बुझाइएको प्रहरीको भनाई छ ।
मृत गोरुलाई बर्दघाट नगरपालिकाका पशु चिकित्सकको रोहरवरमा आवश्यक कानुनी प्रकृया पुरा गरी व्यवस्थापन गरिएको छ ।
चालकलाई मूलकि अपराध संहिता २९७४ अन्तर्गत पशुपंक्षि सम्बन्धी कसुरमा म्याद थप गरी अनुसन्धान कार्य भइरहेको प्रहरीको भनाई छ ।
