असोज १२। भारी वर्षाका कारण नारायणी नदीले खतराको तह पार गरेको छ । विभिन्न खोला नदीमा बढेको बाढीसँगै नारायणी नदीमा पानीको सतह बढ्दै गएको हो ।
पछिल्लो २४ घण्टामा चितवनको त्रिशूली नदीको कालीखोलामा २७६.२ मिलिमिटर, कल्याणपुरमा २९१ मिलिमिटर, शक्तिखोरमा २३१.८ मिलिमिटर, नारायणी फिल्ड अफिस आसपास २४७.४ मिलिमिटर, झुवानीमा २३८ मिलिमिटर र देवघाटमा २४४.२ मिलिमिटर वर्षा भएको रेकर्ड गरिएको छ ।
नारायणी नदीले देवघाटमा खतराको तह नाघेको छ भने जलसतह अझै बढ्दो क्रममा छ । यहाँ जलसतह ९ मिटरलाई खतराको तह मानिन्छ । अहिले जलसतह १०.५७ मिटर नाघिसकेको देवघाट जलसहत मापन केन्द्रले जनाएको छ ।
नारायणगढस्थित नारायणी पुलमा जलसतहले सतर्कता तह नाघेको छ । यहाँको सतर्कता तह ११ मिटर रहेकामा जलसतह बढेर १२.७२ मिट पुगेको छ । नारायणी लगायत विभिन्न १३ वटा नदी तथा खोलामा बाढीले खतराको तह नाघेको छ ।
नारायणी नदीमा आएको बाढी गैँडाकोटका केही क्षेत्रमा पसेको छ । गैँडाकोट २ को अक्सफोर्ड कलेज क्षेत्रका वस्ती समस्यामा परेका छन् । बाढी पसेर समस्या भएको स्थानीयले बताएका छन् ।
