साउन ९ । काठमाडौंको त्रिभुवन अन्तर्राष्ट्रिय विमानस्थलमा बुधबार सौर्य एयरलाइन्सको जहाज दुर्घटना भएको छ । टेकअफ भएको २० सेकेण्डमै जहाज धावनमार्ग छोडेर भित्तामा बजारीन पुगेको थियो ।
स्थानीयका अनुसार बाहिर राखिएको ट्याकंकरमा ठोक्किएर दुईटुक्रा भएको थियो ।
दुर्घटनामा १ यमनका नागरिक सहित १८ जनाको मृत्यु भएको छ। मृत्यु हुनेमा १७ जना नेपाली नागरिक हुन् । एक जना बाँचेका छन्। जसमा जहाजका पाइलट रहेका छन् । उनको अहिले उपचार भइरहेको छ ।
बुधबार बिहान ११ः १५ बजे काठमाडौंबाट पोखरा उडेको जहाज दुर्घटनामा परेको थियो।सौर्यको ९ एन एएमई सीआरजे २०० कलसाइनको जहाज बुधबार बिहान ११ः१५ मिनेटमा दुर्घटनामा परेको थियो।
जहाज रनवे ०२ तर्फबाट उडेको र पूर्वतर्फ रनवे २० नजिकै दुर्घटनामा परेको थियो।
दुर्घटनामास्थलबाट ३७ वर्षीय क्याप्टेन मनीष शाक्यलाई उद्धार गरी प्रहरीले केएमसी अस्पताल पुर्याएको थियो। उहाँको अनुहारमा चोट लागेको र बोल्न सक्ने अवस्थामा रहेको प्रहरीले जनाएको छ।
जहाजमा सौर्य एयरलाइन्सकै कर्मचारीहरू रहेका थिए। दुर्घटनामा मृत्यु भएका १८ जनाको पहिचान खुलेको छ।
जहाजका को–पाइलट एस कटुवालको मृत्यु भएको छ। त्यस्तै अमितमान महर्जन, सागर आचार्य, दिलीप बर्मा, मनुराज शर्मा, अश्विन निरौला, सुदीपलाल जोशी, सर्वेस मरासैनी, श्याम विन्दुकार, नवराज आले, राजाराम आचार्य, अधिराज शर्मा, प्रिजा खतिवडा, उद्धव पुरी, यज्ञप्रसाद पौडल, सन्तोष महतो, पुण्यरत्न शाही र अरेफ रेडाको मृत्यु भएको प्रहरीले जनाएको छ।
रेडा यमनी नागरिक हुन्। प्रिजा खतिवडा पनि उक्त जहाजमा सवार थिइन्। बुधबार पोखराका लागि उडेपछि दुर्घटनामा परेको जहाजमा एकै परिवारका तीन जनाले ज्यान गुमाएको खुलेको छ । सौर्य एयरलाइन्सका प्राविधिक मनुराज शर्मा, उनकी श्रीमती प्रिजा खतिवडा र ४ वर्षीय छोरा अधिराज शर्माले दुर्घटनामा ज्यान गुमाएका हुन् ।
प्रिजा ऊर्जा जलस्रोत तथा सिँचाइ मन्त्रालयमा सहायक कम्प्युटर अपरेटर थिइन् ।
दुर्घटनामा परेर मृत्यु भएकाहरूको शव त्रिवि शिक्षण अस्पताल महाराजगञ्ज लगिएको छ। पोस्टमर्टम गरेको ३ दिनपछि शव परिवार तथा आफन्तको जिम्मा लगाउने बताइएको छ ।
जहाज दुर्घटना स्थल निरीक्षण गर्न प्रधानमन्त्री केपी शर्मा ओली, गृहमन्त्री रमेश लेखक, नागरिक उड्डयन मन्त्री बद्री पाण्डेलगायत पुगेका थिए। गृहमन्त्री लेखकले दुर्घटनाको छानविन समिति बनाएर अनुसन्धान गर्ने बताउनुभयो ।
