मनप्रसाद भाट, मथार, नवलपुर ।
नवलपुर जिल्लाको बुलिङटार २ मथारमा पहिलो पटक राष्ट्रिय विद्युत् प्रसारणलाइन पुगेको छ । यही कार्तिक २८ बाट राष्ट्रिय प्रसारण लाइनबाट बत्ती बालिएका हो । मथारको ४१ घरधुरीमा राष्ट्रिय प्रसारण लाइनको मिटर जडान भएर बत्ती बलेपछि स्थानीय खुसी भएका छन् ।
करिब ४ बर्ष अगाडिबाट पोल गाड्ने काम सुरु भएतापनि बल्ल अहिले लेखनाथ विद्युत् प्राधिकरण पोखराबाट प्रसारित लाईन बुलिङटारको अन्य वडा ६,५,४,३ हुँदै वडानम्वर २ मथारसम्म आएको हो । अव यसलाई वडानम्वर २ कौ लादी खोलापारीबाट वडानम्वर १ सम्म पुर्याउन पोल गाड्ने काम भएको छ ।
नेपाल विद्युत प्राधिकरण कावासोती प्रसारण लाइनबाट विद्युत वितरण गर्न बुलिङटार ४ बोझापोखरीमा सवस्टेशन बनाउने काम भएपनि अन्य कार्य सम्पन्न नहुँदा अहिले पोखराबाट लाइन तानिएको हो ।
कावासोतीबाट उपलब्ध गराइने विद्युतको काम सम्पन्न भएपछि कावासोतीकै विद्यतु लाइन जडान हुने कावासोती विद्युत वितरण केन्द्रले जानकारी दिएको छ ।
लामो समयको पर्खाइपछि राष्ट्रिय प्रसारण लाइन आउँदा गाउँले खुसी भएका छन् । स्थानीय उपभोक्ताहरुले ठूलो राहतको अनुभूति गरेको बताउँदै अव विद्युतीय प्रविधिको प्रयोगमा सहजता आउनुकासाथै विकासको एउटा फड्को समेत भएको बताए ।
उनीहरुले यसको दीर्घकालिन सम्म उपभोगमा सहजताको वातावरणका लागि सम्बन्धित निकायलाई ध्यानाकर्षण गराएका छन् । सडकसंजालको सहजतासँगै विद्युत् पुगेपछि स्थानीय उत्पादन बजारमा पुर्याउन र त्यसको बहूउपयोगका विधिहरु प्रयोगामा सहजता भएको स्थानीयको भनाई छ । पटक पटक विद्युत आइपुग्छ भनेपनि कुरामै सीमित हुँदा निरास भएका जनता अहिले भने खुसी भएका हुन् । सुरुमा स्थानीय सामानबाट जोहो गरेर वत्तीको सहायता लिएका स्थानीयले सोलार प्यानल प्रयोग गर्दै आइरहेका थिए । बीचमा कुलाको पानीबाट रातीमा मात्रै बत्ती वल्नेगरी विद्युत प्रयोग गरेपनि त्यो अस्थायी सँगै बाढीले समस्या दिइरहने गर्दथ्यो । तर अव राष्ट्रिय लाइन आएपछि ति दुखहरु नहुने स्थानीय बताउँछन् ।
विद्युत प्राधिकरण कावासोती प्रसारण लाइनको काम चैत २०८० भित्र सम्पन्न हुने र त्यसपछि वाँकी वस्तीहरुमा विद्युत पुर्याइने बताइएको छ । हाल कालिगण्डकी वारपारका वस्तीमा मात्रै यो लाइन पुगेको हो ।
