चितवन । पूर्वी चितवनमा गैंडाको आक्रमणबाट एक जनाको मृत्यु भएको छ । मृत्यु हुनेमा रत्ननगर नगरपालिका वडा नम्बर ९ का ६० वर्षिय चन्द्र वहादुर तामाङ रहेका छन् । चितवन राष्ट्रिय निकुञ्जका अनुसार आज बिहान बाटोमा हिड्ने क्रममा रत्ननगर नगरपालिका वडा नम्बर ९ लालपर्सा नजिक उनलाई गैंडाले आक्रमण गरेको हो ।

बिहान ६ वजेको समयमा तामाङ मृत अबस्थामा भेटिएको र घटनाको प्रकृति एवं चोट हेर्दा गैंडाको आक्रमण गरेको देखिएको निकुञ्जका सूचना अधिकारी गणेश प्रसाद तिवारीले बताउनुभयो ।

चालु आर्थिक वर्षमा वन्यजन्तुको आक्रमणबाट जिल्लामा पाँच जनाले ज्यान गुमाएका छन् । ज्यान गुमाउनेमा बाघको आक्रमणबाट १ जना, हात्तीको आक्रमणबाट १ जना र गैंडाको आक्रमणबाट ३ जना रहेको तिवारीले जानकारी दिनुभयो ।