काठमाण्डौ । आगामी शैक्षिक सत्रका विद्यार्थीलाई बैशाख महिनामै पाठ्यपुस्तक पुग्नेगरी तयारी थालिएको पाठ्यक्रम विकास केन्द्रले जानकारी दिएको छ । चैत १५ भित्र पाठ्यपुस्तक छपाइ सकेर वितरकलाई दिइने बताउँदै सरकारले यसवर्ष विद्यालय तहका विद्यार्थीलाई समयमै पाठ्यपुस्तक पुर्याउन सरकारी स्वामित्वको जनक शिक्षा सामग्री केन्द्रलाई ६ देखि १० सम्मको र निजी प्रकाशकलाई १ देखि ५ सम्मको पुस्तक छफाइ गर्न दिएको थियो । त्यसका लागि १११ वटा प्रकाशक छनोट गरिएको छ ।
कक्षा १–५ को एक करोड २० लाख थान र कक्षा ६–१० को एक करोड ५० लाख थान पुस्तक छपाइ गर्नुपर्ने हुन्छ । जनक शिक्षा सामग्री केन्द्रले ८० लाख थान पुस्तक छपाइ सकेर बाइन्डिङसमेत भइसकेको र १० लाख थानको बाइन्डिङ भइरहेको केन्द्रले जनाएको छ । छपाइ गर्न बाँकी ६० लाखको दैनिक डेढ लाखको दरले भइरहेको र १५ चैतभित्र सकिने दावी गरिएको हो ।
आगामी शैक्षिक सत्र २०८० देखि कक्षा ५, ८ र १० मा नयाँ पाठ्यक्रम लागू हुनेछ । जस अनुसार कक्षा ८ र १० को सबै किताब नयाँ प्रकाशन गर्नुपर्नेछ ।
