चितवन । चौधरी मोटर्स ,खैरहनी चितवनको कालिका नगरपालिकामा जारी कमरेड निमा स्‍मृति खुला नक आउट फुटबलको फाइनलमा प्रवेश गरेको छ । आज (मंगलबार) सम्पन्न दोस्रो सेमिफाइनलमा शान्तिको किचन सौराहालाई पाखा लगाउदै खैरहनीले फाइनलमा स्थान बनाएको हो । खेलमा खैरहनीले ३-१ को पुनरागमन जित हात पार्‍यो। खेलमा सुरुवाती अग्रता भने शान्तिको किचनले लिएको थियो । ११ औं मिनेटमा गोल गरेको शान्तिको किचनले अग्रता जोगाउन सकेन । सुरुवातमा एक गोलले पछि परेको खैरहनीले २४ औं मिनेटमा बराबरी गोल फर्कायो । ४८ औं मिनेटमा गोल गर्दै खैरहनीले अग्रता लियो । ५१ औं मिनेटमा तेस्रो गोल गर्दै खैरहनीले ३-१ को जित सुनिश्चित गर्‍यो । खैरहनीका सन्देश श्रेष्ठ म्यान अफ दि म्याच घोषित भए । खैरहनीले अब उपाधिका लागि कमरेड निमाको सामना गर्नेछ । सोमबार सम्पन्न पहिलो सेमिफाइनलमा भरतपुर ८ गौरीगन्जलाई हराउँदै कमरेड निमा फाइनलमा प्रवेश गरिसकेको छ । फाइनल १९ गते हुनेछ। प्रतियोगिताको विजेताले एक लाख तथा उपविजेताले ५० हजार रुपैयाँ प्राप्त गर्ने आयोजक अखिल नेपाल राष्ट्रिय स्वतन्त्र विद्यार्थी यूनियन (क्रान्तिकारी) कालिका नगर समितिका अध्यक्ष सिद्धान्त मगरले जानकारी दिए ।