चितवन । चितवन जिल्ला दुग्ध उत्पादक सहकारी संघले दूधको मूल्य वृद्धि गर्न माग गरेको छ । उत्पादन लागत तथा उपभोग्य वस्तुको भाउ बढेको भन्दै उनीहरुले आज पत्रकार सम्मेलन गरेर दूधको मूल्य बढाउन माग गरेका हुन् । कार्यक्रममा सहकारी संघका अध्यक्ष किशोर वाग्लेले चितवनलाई नेपाल सरकारले तीन वर्ष अगाडि दूधमा आत्मनिर्भर क्षेत्र घोषणा गरेको जानकारी दिनुभयो । उहाँका अनुसार जिल्लामा ३३ प्रतिशत दुग्ध उत्पादक किसान रहेका छन् । ३८ हजार ६११ दूधालु गाईभैँसी रहेका छन् ।
जसबाट तीन लाख ५० हजार लिटर दूध दैनिक उत्पादन हुँदै आएको उहाँको भनाइ छ । त्यस्तै जिल्लामा उत्पादन भएका ५५ प्रतिशत दूध काठमाडौँ, भक्तपुर, ललितपुर, मकवानपुर र कास्की लगायतका जिल्लामा सप्लाई हुँदै आएको बताउँदै हाल ढुटो, मकै, पिना, दाना, चोक्कर जस्ता उपभोग्य वस्तुको मूल्य २० देखि ३० प्रतिशतले बढेको हुँदा किसान मर्कामा पर्दै गएको कारण दूधको मूल्य बढाउन माग गरेका हुन् ।
यसरी उपभोग्य वस्तुको मूल्य बढ्दा किसानले प्रति लिटर दूधमा ८ देखि १० रुपँया घाटा बेर्होनु परेकोले सरकारलाई दूधको मूल्य बढाएर न्यूनतम ७० बनाइदिन माग गरेको उहाँको भनाई छ। त्यस्तै उहाँका अनुसार संघले दूधको मूल्य बढाउन सँगसँगै कच्चा पदार्थको मूल्य बृद्धिलाई तुरुन्तै घटाउन तथा बैँक तथा बित्तीय संस्थाहरुलाई ऋण असुलीमा धरपकड नगर्न माग गरेको छ ।
कार्यक्रममा अध्यक्ष वाग्लेले सरकार सँगसँगै चितवनका किसानलाई पनि घाँसको प्रयोग धेरै गर्दै चोक्करलाई कम प्रयोग गरेर चितवनबाटै चोकर बिस्थापित गर्न समेत माग गर्नुभएको हो। संघका उपाध्यक्ष केशव पोख्रेलले चितवन जिल्ला दूध उत्पादनको मुख्य केन्द्र भएको बताउँदै पछिल्लो समय लागत मूल्य बढ्दा तथा राज्यले ठोस कदम नल्याउँदा किसान मर्कामा परेको बताउनुभयो ।
सरकारले लागत मूल्यलाई हेरेर किसानको हितमा काम नगरिदिँदा विदेश पलायन हुन बाध्य भएको समेत उहाँको भनाई छ। त्यस्तै संघका कोषाध्यक्ष बालकृष्ण उप्रेतीले नेपाल सरकारले विसं २०७८ साल माघ १६ गते दूधको मूल्य बढाएदेखि हालसम्म नबढाएको जानकारी दिनुभयो । उहाँका अनुसार हाल बजारमा चोक्करको मूल्य एक हजार ५०० बाट २२ सय पुगेको छ ।
सरकारले उपभोग्य वस्तुको मूल्य निधारण नगर्दा कालो बजारी बढ्दै गएको बताउँदै किसानलाई आर्थिक भार धेरै रहेको उहाँको भनाई छ । अहिले बजारमा किसानले प्रति लिटर दूधको मूल्य जम्मा ५६.४ पैसा मात्रै पाएको उहाँको भनाई छ । कार्यक्रममा बागमती प्रदेशका कृषि तथा पशुपन्छी विकास मन्त्री केशब पोख्रेलले परिचयपत्रदेखि किसानका हरेक समस्या समाधान गर्ने धारण समेत व्यक्त गरेका थिए ।
