काठमाडौँ । सांसद बन्न अयोग्य ठहर गरेपछि रवि लामिछानेको उपप्रधान तथा गृहमन्त्री पद गुमेको छ ।
सर्वोच्च अदातलले लामिछानेले नेपाली नागरिकता लिने प्रक्रिया नै पुरा नगरेको भन्ने फैसला गरेपछि सो पद पनि गएको हो । उनले हिजै प्रधानमन्त्री पुष्पकमल दाहाल प्रचण्डलाई राजिनामा बुझाएर निजी निवासमा सरिसकेका छन् ।
नेपालको मन्त्री हुनका लागि नेपाली नागरिक हुनुपर्छ । अदालतले नागरिकता नै नरहेको ठहर गरेपछि मन्त्री पद स्वतः गएको छ । लामिछाने ३२ दिन अघि उपप्रधान तथा गृहमन्त्री बनेका थिए । सर्वोच्च अदालतको संवैधानिक इजलासको फैसलापछि पुस ११ गते उपप्रधानमन्त्री तथा गृहमन्त्री नियुक्त भएका लामिछाने पदच्युत भएका हुन् । अमेरिका नागरिकता र पासपोर्ट परित्याग गरेपनि लामिछानेले नेपाल नागरिकता लिने प्रक्रिया सुरु नगरेपछि सांसद बन्न अयोग्य भएको अदालतको आदेशमा उल्लेख छ ।
सर्वोच्च अदालतमा कामु प्रधानन्यायाधीश हरिकृष्ण कार्कीको संवैधानिक इजलासबाट फैसला भएको छ । टेलिभिजन पत्रकारिता छाडेर राजनीतिमा होमिनुभएका लामिछाने सभापति रहेको राष्ट्रिय स्वतन्त्र पार्टीले मंसिरमा सम्पन्न आमनिर्वाचनमा २० सीट जितेको छ ।
यसैविच लामिछाने विजयी भएको चितवन क्षेत्रनम्वर २ मा उप चुनाव हुने भएको छ । यद्यपी आधिकारिकता भने आइसकेको छैन ।
