चितवन । चितवनको कालिका नगरपालिकामा जारी कमरेड निमा स्मृति खुला नक आउट फुटबल प्रतियोगितामा चौधरी मोटर्स खैरहनी क्वाटरफाइनलमा पुगेको छ ।
मंगलबार सम्पन्न प्रतिस्पर्धात्मक खेलमा यूनिक एफसीलाई १–० ले निराश बनायो ।
खैरहनीलाई जिताउन सुनिल तामाङले गोल गरे । खेलको पहिलो हाफ गोलरहित बराबरीमा सकिएको भएपनि ६९ औं मिनेटमा सुनिलले गोल गरे । उक्त गोल नै खेलको निर्णायक गोल बन्यो । खैरहनीका अन्जन चौधरी म्यान अफ दि म्याच घोषित भए ।
आज पहिलो चरणको अन्तिम खेल हुनेछ । आयोजक अखिल नेपाल राष्ट्रिय स्वतन्त्र विद्यार्थी यूनियन क्रान्तिकारी कालिका नगर समितिका अध्यक्ष सिद्धान्त मगरका अनुसार बुधबार चिसापानी एफसी र कठार एफसी भिड्नेछन् ।
जनयुद्धमा सहादत प्राप्त गर्ने सहिदहरुको सम्झनामा प्रतियोगिता आयोजना भएको हो । १९ गतेसम्म हुने प्रतियोगिताको विजेताले एक लाख तथा उपविजेताले ५० हजार रुपैयाँ प्राप्त गर्नेछ । यस्तै विधागत उत्कृष्ट खेलाडीहरुलाई पनि पुरस्कारको व्यवस्था गरिएको छ ।
