चितवन । जिल्लाका विभिन्न स्थानमा औपचारिक तथा अनौपचारिक कार्यक्रम गरि मंगलबार आठौँ अन्तर्राष्ट्रिय योग दिवस मनाइएको छ । प्राकृतिक चिकित्सालय वागेश्वरीले आयोजना गरेको योग दिवसको कार्यक्रममा योग प्रशिक्षण दिनुका साथै यसको महत्वबारे जानकारी दिइएको थियो ।
कार्यक्रममा सहभागी पूर्वशिक्षा मन्त्री गिरीराजमणि पोखरेलले जीवनलाई सुखमय र उत्पादनशील बनाउन योगले ठूलो योगदान गर्ने बताउनुभयाे। योग नेपालको पहिचानसँग सम्बन्धित भएकाले योगको स्वामित्व नेपालले लिनुपर्नेमा उहाँको जाेड थियाे ।
पाेखरेलले भन्नुभयाे, ‘योगलाई संगठित रुपमा पठनपाठनसँग जोडेर लगियो भने हाम्रो देशलाई समृद्धिको दिशामा लैजान सकिन्छ’ । विद्यालय शिक्षा र प्राविधिक शिक्षामा योगको पाठ्यक्रम सुरु भइसकेको भन्दै योगलाई युवा पुस्ताले अभियानका रुपमा लैजान सक्ने बताउनुभयाे । उहाँ शिक्षामन्त्री भएका बेला योगलाई पाठ्यक्रममा समावेश गरिएको थियो ।
योग गुरु नानीराम दाहालले योग प्रशिक्षण दिनुभयाे ।
राति निन्द्रा नलाग्ने व्यक्तिले साँझपख पसिना बग्नेगरी योग गर्दा मन शान्त हुने र निन्द्रा नियमित रुपमा लाग्ने उहांकाे भनाइ थियाे । पछिल्लो समय विश्वका कयौँ देशका नागरिकले योगलाई अवलम्बन गर्न थालेका छन् ।
