नवलपुर । जिल्ला अदालत नवलपुरले सक्कली भन्दै नक्कली सुन बिक्री गर्ने दुई जनालाई भरतपुर कारागार चलान गरेकाे छ ।
जिल्ला पूर्व चम्पारण थाना चिरही ७ खडतरी बिहार प्रदेश भारत बस्ने बर्ष २४ को दिपक कुमार जयसवाल र जिल्ला गोरखपुर थाना रामगढताल ६ तारामण्डल कोलनी उत्तर प्रदेश भारतका बर्ष ३९ को राम प्रसाद चौधरीलाइ कारागार पठाइएको हाे ।
उनीहरूले गत जेठ ०३ गते करिव ४ बजेतिर कावासोती नगरपालिका २ थानाचोक स्थित आरति सुनचाँदी पसलमा नक्कली सुन लाई सक्कली भनेर झुक्काई बिक्री गरी रु. ६४ हजार रकम समेत लिएका थिए ।
पसल संचालक  स्याङ्जा चापाकोट नगरपालिका वडा नं. ६ घर भई हाल कावासोती २ थानाचोक बस्ने बर्ष ३३ का सन्जय बिकले जाहेरी दरखास्त दिएपछि प्रहरीले अनुसन्धान सुरु गरेकाे थियाे ।
प्रहरीले सम्पुर्ण अनुसन्धान पुरा गरी जेठ २७ गते जिल्ला सरकारी वकील कार्यालय नवलपरास ( पूर्व ) मा पेश भएकोमा नवलपुर जिल्ला अदालतले असार ३ गतेको आदेशले मुद्दा पुर्पक्षको लागी प्रतिवादीहरु जयसवाल र राम प्रसाद चौधरी कारागार कार्यालय चितवन चलान भएको नवलपुर प्रहरीले जानकारी दिएकाे छ।