धनगढी । डोटीको शिखर नगरपालिका–१ गेरुपानीमा शनिबार भएको बस दुर्घटनामा वेपत्ता १८ महिने एक बालक अझैं फेला परेका छैनन् ।
कैलालीबाट अछाम गइरहेको ना ५ ख ९६६३ नम्बरको यात्रुबाहक बस शनिबार बिहान ५ बजेतिर गेरुपानीमा सडकबाट सेती नदी किनारामा खसेको थियो ।
जिल्ला प्रहरी कार्यालयका अनुसार दुर्घटनामा अछाम चौरपाटी गाउँपालिका–६ का सुरेन्द्र शाहीका १६ महिने छोरा सुजन वेपत्ता भएका हुन् । दुर्घटनामा १३ जना घाइते भएका थिए । घाइतेमध्ये बसका कण्डक्टरसहित तीन जनाको अवस्था गम्भीर रहेको छ ।
घाइतेहरुलाई उपचारका लागि धनगढी पठाइएको छ । सामान्य घाइतेको स्थानीय अस्पतालमा उपचार भइरहेको छ ।
डोटीका नायव प्रहरी उपरीक्षक (डिएसपी) भोलाकुमार भट्टका अनुसार दुर्घटनाग्रस्त बस नदी किनारामा खसेका कारण बालक सुजन नदीमा वेपत्ता भएको अनुमान गरिएको छ ।
दुर्घटनास्थल आसपास खोजी गर्दा पनि साँझ सात बजेसम्म वेपत्ता बालक फेला पर्न सकेका छैनन् ।
दुर्घटनापछि बसका चालक फरार रहेको र उनको खोजी भइरहेको प्रहरीले जनाएको छ ।