मनाङ । स्थानीय तहको निर्वाचन २०७९ को मतदानमा बरावर मत आएपछि मनाङ जिल्लाको चामे गाउँपालिका वडानम्वर ५ को अध्यक्षका लागि गोलाप्रथा गरिएको छ ।
काँग्रेस र एमालेका उम्मेदवारले ३०/३० मत ल्याएपछि गोलाप्रथा गरिएको हो । गोलाप्रथाबाट नेकपा एमालेका कैले गुरुङ विजयी हुनुभएको छ ।
शुक्रबार रातिको मतपरिणाम अनुसार एमालेका उम्मेदवार गुरुङ र कांग्रेस उम्मेदवार फुर्पा छिरिङ लामाले बराबर मत ल्याएपछि दुवैजनाको सल्लाहमा गोलाप्रथा गरिएको हो । गुरुङ यसअघि पनि चामे गाउँपालिका ५ का वडाअध्यक्ष रहनुभएको थियो ।

उक्त वडामै खुला सदस्यमा नेकपा एमालेका समिरा गुरुङ र नेपाली कांग्रेसका सेराव विष्टको बराबर २८/२८ मत खसेको थियो । दुवैजनाको सहमतिमा गोलाप्रथा गर्दा एमालेका समिरा विजयी हुनुभएको छ ।
गाउँपालिका अध्यक्षमा एमालेका लोकेन्द्रबहादुर घले र उपाध्यक्षमा कांग्रेसका मिङमार ढोमा लामा निर्वाचित भइसक्नुभएको छ ।