मनाङ । स्थानीय तहको निर्वाचन २०७९ मा मतदान सम्पन्न पश्चात मतगणना पनि सुरु भएका छन । मनाङमा भने मतगणनाको नतिजा आउन पनि सुरु भएको छ । मनाङको चामे गाउँपालिका अध्यक्षमा एमालेका लोकेन्द्रबहादुर घले निर्वाचित हुनुभएको छ। यसअघि पनि उहाँ सोही गाउँपालिकाको अध्यक्ष हुनुहुन्थ्यो ।
३ सय २० मत ल्याएर अध्यक्षमा निर्वाचित हुँदा प्रतिद्वन्द्वी कांग्रेसका छिरिङ ध्वर्जे लामाले २ सय ७९ मत ल्याउनुभएको छ । उपाध्यक्षमा भने कांग्रेसकी मिङमार ढोमा लामा निर्वाचित हुनुभएको छ । उहाँले ३ सय २५ मत ल्याउँदा प्रतिद्वन्दी एमालेकी आशकुमारी गुरुङले २ सय ७४ मत ल्याउनुभएको छ ।
वडाअध्यक्षतर्फ वडा नम्बर ३ को अध्यक्षमा कांग्रेसका विनोद लामा ७५ मत ल्याएर विजयी हुँदा प्रतिद्वन्दी एमालेका प्रेमकुमार श्रेष्ठले ५५ मत ल्याउनुभयो । वडा नम्बर ४ मा कांग्रेसका लोप्साङ लामाले ८८ मत ल्याएर वडाअध्यक्षमा निर्वाचित हुँदा प्रतिद्वन्दी एमालेका पाल्साङ लामाले ४० मत पाउनुभएको छ।
वडा नम्बर ५ को अध्यक्षमा एमालेका कैले गुरुङ र कांग्रेसका फुर्पा छिरिङ लामाले बराबर ३०/३० मत पाउनुभएको छ । यसअघि वडा नम्बर १ मा एमालेका खड्कजंग गुरुङ र वडा नम्बर २ मा कांग्रेसका मंगलदेव गुरुङ निर्विरोध भइसक्नुभएको थियो ।
त्यस्तै नार्पाभूमि गाउँपालिकाको अध्यक्षमा नेपाली कांग्रेसका कोन्जो तेन्जिङ लामा १५८ मत ल्याएर विजयी हुनुभएको छ। मध्यरातमा सकिएको मतगणनाअनुसार लामाका निकटतम् प्रतिद्वन्द्ववी स्वतन्त्र उम्मेदवार कृष्णबहादुर लामाले १११ मत ल्याउनुभयो । ४ सय ८४ मतदाता रहेको गाउँपालिकामा ३०४ मत खसेको थियो । ३५ मत भने बदर भएको छ ।
