गैँडाकोट । नेपाली काँग्रेसबाट गैँडाकोटको मेयरका उम्मेदवार मदनभक्त अधिकारीले ले गैँडाकोट १४ चक्रपथ र गैँडाकोट १५ स्थित झराही खोलामा तटबन्धन गर्ने योजना रहेको बताउनुभएकोछ ।
शुक्रबार गैँडाकोट १४ र १५ मा भएको चुनावी कार्यक्रममा बोल्दै उहाँले अमरापुरी चोक, सालघारी भागर, नगरटाँडी हुँदै कृष्णमन्दिरसम्मको चक्रपथ निर्माणको प्रतिवद्धता व्यक्त गर्नुभएको हो । यस्तै भूमिहिन स्थानीयको समस्या समाधानमा सक्दो पहल गरि छिटो निस्सा उपलब्ध गराउने अधिकारीले बताउनुभयो । आज नै भएको गैँडाकोट १५ को कोण सभामा अधिकारीले झराही खोलामा तटबन्धन गर्ने कार्यलाई प्राथमिकतामा राखेर काम गर्ने बताउनुभएको हो । यस लागि आफ्नो नेतृत्वमा रहेको समूहलाइ मतदान गर्न आह्वान गर्दै उहाँले सो कुरा बताउनुभएको हो ।
गैँडाकोट उपप्रमुख पदकी उम्मेद्वार शान्ति कोइरालाले सीमान्तकृत दलित, जनजाति, बाबुआमा गुमाएका, विपन्न क्यान्सर रोगी, मृगौला रोगी, मुटुरोगीका सन्तती तथा जेहेन्दार विद्यार्थीलाई शैक्षिक उन्नयका लागि अनुदान उपलब्ध गराउने बताउनुभयो।
उपप्रमुख पदकी उम्मेद्वार कोइरालाले सामुदायिक विद्यालयहरुमा शिक्षालाई निःशुल्क गर्ने बताउनुभो । यसैगरि युवाहरुको प्रतिभा प्रोत्साहनका लागि गैँडाकोट ३, ४ र ८ को बीचमा निर्माणाधिन क्षेत्रीय रंगशाला र १३ नम्बर वार्डको सुनवर्षा चौरलाई क्रिकेट मैदान बनाउन पहल गर्ने बताउनुभएको छ ।
गैँडाकोट १४ का वडा अध्यक्ष पदका उम्मेद्वार महाशर्मा न्यौपानेले वडा भित्रका सामुदायिक विद्यालयको स्तरोन्नती, सडक पूर्वाधारको विकास, वडाबासीका लागि सिपको विकास र रोजगारिको सिर्जना, वडा भित्रको भल निकासका लागि पहल गर्ने बताउनुभएको वडा सभापति युगेन्द्र कोइरालाले जानकारी दिनुभयो ।
गैँडाकोट १५ मा भएको काँग्रेसको कोण सभामा वडा अध्यक्ष पदका उम्मेद्वार प्रेमप्रसाद तिमिल्सिनाले वडा कार्यालयको निर्माण, शिक्षा र स्वास्थ्यमा सुधार, कृषि क्षेत्रको विकासको लागि किसानलाई सहजीकरण लगायतका योजना अघि सारेको बताउनुभयो ।