भरतपुर, १७ वैशाख । भरतपुर महानगरपालिकाको मेयर पदका उम्मेदवार विजय सुवेदीले भरतपुरमा आफू निर्वाचित भए गर्भवतीलाई मासिक एक हजार रुपैयाँका दरले भत्ता उपलब्ध गराउने घोषणा गर्नुभएको छ ।
नेकपा (एमाले) भरतपुर–१२ ले आज आयोजना गरेको चुनावी कोणसभामा बोल्दै मेयर पदका उम्मेदवार सुवेदीले गर्भवतीको पोषणका लागि भत्ता दिइने घोषणा गर्दै आमाहरुको स्वास्थ्य राम्रो हुन सके स्वस्थ बच्चा जन्मने कुरालाई मध्यनजर गर्दै गर्भवती नगरवासीहरुको पोषणमा भत्ताले सहयोग मिल्ने सुवेदीले बताउनुभयो । ‘आज आमाको मुख हेर्ने दिन अर्थात माता तीर्थ औँसी पनि हो, सबै आमाहरुप्रति सम्मान छ’ सुवेदीले भन्नुभयो , ‘यस अवसरमा म महानगर प्रमुख भएको खण्डमा हरेक गर्भवतीलाई मासिक एक हजार रुपैयाँका दरले भत्ता उपलब्ध गराउने घोषणा गर्दछु ।’
निःस्वार्थ, निष्पक्ष ढंगले कामगरी महानगरमा सुशासन र समृद्धि हासिल गर्ने आफ्नो संकल्प रहेको उनले बताए । भ्रष्टाचारमा शून्य सहनशीलता कायम गरिने सुवेदीले प्रतिबद्धता ब्यक्त गर्नुभयो । कार्यक्रममा भरतपुर–१२ का वडा अध्यक्ष उम्मेदवार लेखराज पन्त ‘हरि’ले वडावासीको सेवा गर्न आफू उमेदवारका रुपमा खडा भएको बताउनुभयो ।
वडा कमिटी ईन्चार्ज शेषमणि नेपालको अध्यक्षतामा भएको कार्यक्रममा एमाले नेता डा तीलचन्द्र भट्टराई, जिल्ला कमिटी सदस्य अन्जु शर्मा दाहाल, वडा कमिटी अध्यक्ष तिलप्रसाद न्यौपाने लगायतले बोल्नुभएको थियो । कार्यक्रम पार्टी वडा कमिटी सचिव शोभा पण्डितले सञ्चालन गर्नुभएको थियो ।
