भरतपुर – भरतपुरमा आज (शनिबार) बाट सुरु भएको स्वर्गीय गणेशबहादुर स्मृति जिल्ला स्तरीय खुल्ला नकआउट फुटबल प्रतियोगितामा टाईगर युवा क्लबले विजयी सुरुवात गरेको छ ।
आज सम्पन्न उद्घाटन खेलमा टाईगर क्लबले हर्दी युवा समाजलाई २-१ ले पाखा लगाएको हो । टाइगर क्लबको जितमा राजेश परियार र सन्दीप राना मगरले गोल गरे । हर्दीका विज्ञान चौधरीले एक गोल फर्काए ।
टाइगर क्लबले खेलको १२ औं मिनेटमा अग्रता लिएको थियो । उसका लागि राजेश परियारले पहिलो गोल गरेका थिए । पहिलो हाफको अतिरिक्त समयमा सन्दीप रानाले गोल गर्दै टाईगर क्लबलाई २-० को अग्रता दिलाए ।
दोस्रो हाफको २३ औं मिनेटमा हर्दीका विज्ञान चौधरीले गोल फर्काए पनि हात टार्न भने सकेनन् । टाईगर क्लबका रोजल दाहाल म्यान अफ दि म्याच चुनिए ।
युनिक क्लब बसेनीको आयोजनामा सुरु भएको प्रतियोगितामा आइतबार तीन खेल हुनेछ । आइतबार पहिलो खेल बिहान ७ बजे सेन्ट्रल कलेज एभरेष्ट क्लब बसेनी र कैलाश युवा क्लबबीच हुनेछ ।
यस्तै दोस्रो खेल दिउँसो २ बजे केबिए ग्लोबल भरतपुर फुटबल क्लब (बिएफसी) र सौराहा युवा समाजबीच हुनेछ भने तेस्रो तथा अन्तिम खेलमा दिउँसो ४ बजे पदमपोखरी फुटबल ट्रेनिङ सेन्टर हेटौंडा र रामपुर फुटबल क्लब रड्स भिड्नेछन् ।
२४ गतेसम्म चल्ने प्रतियोगितामा १६ टोली सहभागी छन् । प्रतियोगिताको विजेताले एक लाख २० हजार तथा उपविजेताले ६० हजार प्राप्त गर्नेछन् । सर्वोकृष्ट खेलाडीले पाँच हजार तथा उत्कृष्ट गोलरक्षक, डिफेन्स, स्ट्राईकर, उच्च गोलकर्ता तथा उदयमान खेलाडीले नगद तीन-तीन हजार प्राप्त गर्ने संयोजक निर्मल अंगाईले जानकारी दिए । नारायणी मोटर्स मुख्य प्रायोजक रहेको प्रतियोगिताको सह-प्रायोजकमा सेन्ट्रल कलेज रहेको छ ।
