गैँडाकोट । आगामी ३० गते हुने स्थानीय तहको निर्वाचन २०७९ का उम्मेदवारहरुलाई गैँडाकोटमा पनि चुनाव चिन्ह प्रदान गरिएको छ । निर्वाचन अधिकृत दीपशिखा मुनाकमीका अनुसार कुखुराको भाले देखि गुलाफको फूलसम्मका चुनाव चिन्ह प्रदान गरिएको हो ।
स्थानीय तह निर्वाचन ऐन, २०७३ को दफा २६ को उपदफा ६ र ७ अनुसार निर्वाचन चिन्ह प्रदान गरिएको हो ।
जसमा मंगोल नेशनल अर्गनाइजेसनका उम्मेदवारले कुखुराको भाले, नेकपा एमालेका उम्मेदवारहरुले सूर्य, काँग्रेसका उम्मेदवारले रुख, नेकपा माओवादी केन्द्रका उम्मेदवारले गोलाकार भित्र हसिया हतौडा, नेकपा एकीकृत समाजवादीका उम्मेदवारले कलम,राप्रपाका उम्मेदवारले हलो, जनता समाजवादी पार्टी नेपालका उम्मेदवारले ढल्केको छाता, राष्ट्रिय जनमुक्ति पार्टीका उम्मेदवारले घर र राष्ट्रिय जनमोर्चाले गिलास चिन्ह पाएका छन् ।
त्यस्तै स्वतन्त्र उम्मेदवारतर्फ उपप्रमुखका उम्मेदवार श्याम सुन्दर भुषालले खानेपानीको धारा,गैँडाकोट ११ को वडाअध्यक्षका उम्मेदवार रवी प्रसाद महतोले ब्याडमिन्टन कर्क,गैँडाकोट १३ को वडाअध्यक्षका उम्मेदवार प्रेमबहादुर पाठक, गैँडाकोट १० का वडाअध्यक्षका उम्मेदवार रुद्रप्रसाद अधिकारी, सोही वडाका वडासदस्यको उम्मेदवार मेघराज सुवेदी, गैँडाकोट ६ को वडाअध्यक्षका उम्मेदवार दल बहादुर थापा,गैँडाकोट ४ को महिला सदस्यतर्फको उम्मेदवार ज्ञानी देवी तिवारी र वडानम्वर १७ का वडा सदस्यको उम्मेदवार रेख बहादुर कामीले गुलाफको फूल, गैँडाकोट १६ का वडाअध्यक्षका उम्मेदवार गोवर्धन ज्ञवाली, १७ का वडाअध्यक्ष्मका उम्मेदवार राजन कडेँलले र १४ को वडासदस्यका उम्मेदवार मेघ नाथ पौडेलले मुढा, गैँडाकोट १ का वडासदस्य उम्मेदवार गोपाल लामिछानेले पुतली, गैँडाकोट १० को सदस्यका उम्मेदवार नारायण सापकोटाले जेब्रा चुनाव चिन्ह पाएका छन् ।
दर्ता भएका राजनीतिक दलबाट उम्मेदवार दिएका मेयर, उपमेयर, वडाअध्यक्ष, वडासदस्यहरुलाई भने सोही पार्टीको चुनाव चिन्ह नै प्रदान गरिएको छ ।
