गैँडाकोट । राष्ट्रिय युवा संघ नेपाल गैँडाकोट ८ कमिटीको आयोजनामा रक्तदान कार्यक्रम सुरु भएको छ । गैँडाकोट कृषि उपज संकलन केन्द्रमा सुरु भएको कार्यक्रम नगरप्रमुख छत्रराज पौडेलले उद्घाटन गर्नुभयो ।

कार्यक्रममा बोल्दै नगरप्रमुख पौडेलले जीवनदान हुने रक्तदान कार्यक्रममा युवाहरु सक्रिय हुनु खुसीको कुरा भएको भन्दै नगरपालिकाले समेत यस्ता कार्यक्रमलाई प्राथमिकतामा राख्ने बताउनुभयो । स्वस्थ्य व्यक्तिले दिन रगतले अर्को कुनै व्यक्तिको जीवन जोगिने जस्तो महत्वपूर्ण कार्यमा निरन्तर लाग्न युवाहरुलाई उहाँको शुभकामना थियो ।

कार्यक्रममा बोल्दै विशिष्ट अतिथि राष्ट्रिय युवा संघ नेपाल नवलपुर जिल्ला अध्यक्ष कृष्ण कडेँलले राजनीतिसँगै युवाहरुलाई सामाजिक कार्यमा समेत अग्रसर गराउने अभियान अनुसार रक्तदान कार्यक्रम गरेको बताउनुभयो । कडेँलले भन्नुभयो,“अन्य राजनीतिक संगठनका युवाहरु जस्तो आन्दोलन, हुलहुज्जत गर्ने संगठन युवा संघ होइन । युवासंघका युवाहरु राजनीतिक चेतनासँगै सामाजिक कार्यमा सक्रिय हुन्छन् भन्ने आजको कार्यक्रमले प्रमाणीत गरेको छ। ”

राजनीतिमा लाग्ने युवाहरुप्रति हेर्ने नजर समाजमा अझै नकरात्मक रहेको भन्दै कडेँलले यसरी सामाजिक कार्यमा युवाहरु लाग्दा सवैमा राम्रो सन्देश जाने र कुनै व्यक्ति रगत अभावले मृत्युवरण गर्नु नपर्ने बताउनुभयो । युवा संघले अन्य सामाजिक कार्यलाई अभियानकै रुपमा लैजाने समेत कडेँलले जानकारी दिनुभयो ।

कार्यक्रममा जिल्ला सल्हाकार एवम् राष्ट्रिय अपाङ्ग संघका केन्द्रीय सदस्य यदुनाथ सिग्देलले मानवीय जीवनलाई दान दिने महत्वपूर्ण कार्यक्रम गरेकोमा आभार व्यक्त गर्दै अव चुनावमा समेत केन्द्रीत हुन युवाहरुलाई आग्रह गर्नुभयो ।

कार्यक्रममा नेकपा एमाले वडानम्वर ८ का अध्यक्ष श्रीहरी चालिसे, वडानम्वर ८ का जनप्रतिनिधि नरवहादुर आले लगायतको उपस्थिती थियो ।
अध्यक्ष नविन रानाको सभापतित्वमा सम्पन्न कार्यक्रममा राष्ट्रिय युवा संघ नेपाल गैँडाकोट नगर सचिव अर्जुन पराजुलीले सहजीकरण गर्नुभएको थियो ।

कार्यक्रम सुरुहुनासाथ ३ जना महिला सहित २१जनाले रगत दिइसक्नुभएको प्राविधिक सहयोग गरहेको नेपाल रेडक्रस सोसाइटी क्षेत्रीय रक्तसंचार केन्द्र भरतपुरकी ल्याव टेक्नोलोजिष्ट विनीता गौतमले जानकारी दिनुभयो ।

कार्यक्रम गर्न एम्स एब्रोड स्टडीले मुख्य प्रायोजकमा सहयोग रहेको छ भने गैँडाकोट नगरपालिका, रोज रिभर वाईन सप्लायर्स, मौलाकालिका वाइन सप्लायर्स,यदुनाथ सिग्देल लगायतले सहयोग गर्नुभएको छ ।

रक्तदान गर्नेहरुलाई प्रमाणपत्र समेत प्रदान गरिएको छ । मुख्य प्रायोजक एम्स एब्रोड स्टडीका प्रोपाइटर कृष्ण कडेँलले विद्यार्थीलाई अध्ययनका लागि विदेश पठाउने संस्था भएपनि सामाजिक कार्यमा समेत आफुहरुले निरन्तर सहयोग गर्दै आइरहेको जानकारी दिनुभयो ।